Синовите на Трамп им продаваат дронови на Емиратите

Компанијата за производство на дронови поддржана од најстарите синови на претседателот Доналд Трамп, „Пауерас“ (Powerus) се состана со официјални лица во Абу Даби за да разговара за продажба на оружје на Обединетите Арапски Емирати (ОАЕ), додека таа земја се обидува да ги зајакне своите одбранбени системи против нападите од Иран, според извори запознаени со ситуацијата.

„Пауерас“, со седиште во Вест Палм Бич на Флорида, е една од неколкуте компании од областа на бесполотните летала кои во последниот месец нуделе напредни одбранбени системи во оваа нафтено богата заливска земја, изјавил еден соговорник. Производителите на оружје испраќаат свои тимови низ Заливот поради зголемената побарувачка за нивните производи, додека конфликтот помеѓу САД и Израел против Иран го распламти регионот. Разговорите со „Пауерас“ уште не довеле до склучување на конечен договор, рекле извори кои сакале да останат анонимни поради доверливост на информациите.

Портпаролката на „Пауерас“ одби да коментира. Министерството за надворешни работи на ОАЕ и канцеларијата на Абу Даби задолжена за односи со медиуми не одговориле на барањата за коментар. Министерството за одбрана на ОАЕ не одговарало ниту на повици, ниту на прашања преку мејл.

Преговорите укажуваат дека војната со Иран, која влегува во вториот месец, го зголемува интересот за системи на беспилотни летала во регионот. Иранската флота на евтини дронови постави математички проблем пред своите противници: САД и нивните партнери на Блискиот исток се соочуваат со мали, едноставни напаѓачки дронови на Исламската Република, додека користат американски пресретнувачки ракети чие производство чини милиони долари, трошејќи скапи ресурси наменети за посложени напади.

Оваа несразмерност отвора потенцијални можности за компании кои произведуваат поевтини системи за одбрана од дронови, вклучително и „Пауерас“. На почетокот на месецов, „Пауерас“ ја претстави пресретнувачката серија „Гардијан 1“ (Guardian-1), наменета за соборување на „камиказа“ дронови, вклучувајќи ги и иранските напаѓачки дронови „шахед 136“ (Shahed-136).

Компанијата планира излез на берза - преку спојување со оператор на голф терен кој е листиран на Nasdaq - во потег најавен претходно месецов, со инвестиции на Доналд Трамп Џуниор и Ерик Трамп во заедничкиот бизнис. Браќата се активни инвеститори во секторот на дронови и партнери се во фондот АВ (American Ventures), кој има удели во компании од оваа индустрија со вредност од околу милијарда долари. Тие се и раководители во TO (Trump Organization). Портпаролката на TO не одговори на барањето за коментар.

Инвестициите на Трамп помладиот во одбранбена технологија привлекуваат внимание од противниците на претседателот во Конгресот. Во писмо до министерот за одбрана Пит Хегсет претходно годинава, демократската сенаторка Елизабет Ворен побара дополнителни информации за државни договори доделени на компанијата АМ (Unusual Machines) - производител на делови за дронови, кој претходно бил поддржан од Трамп Џуниор. Во дополнително барање минатата недела, Ворен побарала подетални информации за компанијата „Пауерас“, прашувајќи дали фирмата добила државни средства и дали „договорите се доделуваат фер - врз основа на национална безбедност и одбранбени потреби - или за финансиски интереси на семејството на претседателот“.

Компанијата АМ исто така инвестира во голф компанијата со која „Пауерас“ се подготвува да излезе на берза. Поранешни американски воени лидери се ангажирани од „Пауерас“: генерал Чарлс Браун и пензионираниот генерал-потполковник Кит Келог се назначени за стратешки советници на компанијата.