„Цела една цивилизација ќе исчезне вечерва“: Трамп упати застрашувачка порака

САД и Израел продолжија со нападите врз Иран неколку часа пред рокот што претседателот Доналд Трамп му го постави на Техеран да прифати план за прекин на огнот, што дополнително ги прави нејасни изгледите за брзо завршување на војната.

Американскиот претседател на Трут сошал објави и застрашувачка порака во која вели дека „цела една цивилизација ќе исчезне вечерва, никогаш повеќе да не се врати“. 

Не сакам тоа да се случи, но веројатно ќе се случи. Сепак, сега кога имаме целосна и тотална промена на режимот, каде ќе преовладуваат поинакви, попаметни и помалку радикализирани умови, можеби може да се случи нешто навистина револуционерно. Кој знае? Ќе дознаеме вечерва – еден од најважните моменти во долгата и сложена историја на светот. 47 години изнуда, корупција и смрт конечно ќе завршат. Бог да ги благослови големите луѓе на Иран!

 

 

 

 

Иранската полуофицијална новинска агенција „Мехр“ соопшти дека се слушнале експлозии на островот Харг, главниот извозен нафтен центар на земјата. „Фокс њуз“ објави дека САД гаѓале бункери, радарска станица и складиште за муниција, како и дека случајно бил погоден и пристанишниот дел на островот.

Иран во вторникот продолжи со напади низ Персискиот Залив, при што и Саудиска Арабија и Обединетите Арапски Емирати пријавија ракетен оган.

Тековните борби укажуваат дека договор за ставање крај на конфликтот не е на повидок, при што Трамп се закани дека ќе уништи ирански електрани, мостови и друга инфраструктура доколку не се постигне договор до 20 часот по источновреме. Слободата на пловидба низ стратешкиот Ормуски теснец мора да биде дел од секој договор, изјави тој во Белата куќа во понеделникот.