Имаа ли инсајдерски информации корисниците на Полимаркет кои се обложија на примирје?

Обложувањата за прекин на огнот меѓу САД и Иран насочија повеќе од 170 милиони долари преку Полимаркет (Polymarket), што претставува еден од најголемите геополитички облози во кратката историја на пазарите за прогнозрање. Сега исходот ја отвора истата дилема која со месеци ја следи оваа платформа: дали корисниците тргуваат врз основа на внатрешни информации и дали платформите можат јасно да исплатат договори за кои посредуваат.

Серија навремени облози за Иран поставени од неодамна отворени анонимни налози на Полимаркет генерираа стотици илјади долари профит досега, што ги поттикна аналитичарите да ја испитаат трговијата барајќи знаци на внатрешно тргување. Некои исплати на облози поврзани со Блискиот Исток сега се замрзнати поради спор, додека корисниците дебатираат за тоа што се смета за „прекин на огнот“.

Овие случаи го истакнуваат проблемот со растот на индустријата која сè уште гради инфраструктура за да ги следи своите амбиции. Речиси сите неодамнешни случаи кои предизвикаа загриженост околу внатрешното тргување се базирани на индиректни докази, без директен доказ за конкретни инсaјдери. Во средата, фирмата за анализа на блокчејн Лукончејн (Lookonchain) истакна три неодамна отворени налози кои обезбедија повеќе од 480.000 долари профит обложувајќи се на прекин на огнот до 7 април и продавајќи ги позициите по високи цени.

Крајниот резултат на договорот за 7 април сè уште е предмет на спор, што ќе ги принуди повеќето трговци да чекаат повеќе од два дена за исплата. Вкупниот обем на пазарот надмина 60 милиони долари и останува отворен за тргување додека спорот не се реши.

Договорите го потенцираат упорниот проблем на пазарите за предвидување, каде настаните од реалниот свет не секогаш се решаваат според јасни критериуми. Дополнително, сè поголемиот број сомнителни активности ја зголемува потребата за решавање на новите ризици кои ги отвораат пазарите за прогнози во момент кога Волстрит се обидува да ги официјализира, а секојдневни корисници масовно пристигнуваат.

Пазарите за предвидување нудат начин за поставување „да-не“ облози на настани, од спорт до избори и доделување награди. Полимаркет исто така ја користи својата активност надвор од САД за да понуди договори поврзани со воени конфликти, што предизвика строга контрола од законодавците. Во Конгресот расте притисокот да се регулира оваа млада индустрија.

Геополитички облози Bloomberg

Полимаркет и неговиот најголем ривал Калши (Kalshi Inc.) се обидоа да го сузбијат внатрешното тргување додека нивните платформи стануваат сè попопуларни. Двете компании потпишаа партнерства со трети страни за да помогнат во следењето на овој проблем и ги заострија своите правила за појасно дефинирање кога облозите се поставени врз основа на внатрешни информации.

Полимаркет не одговори веднаш на барањето за коментар.

Споровите околу тоа како се затвораат пазарите се чести, дури и ако влијаат само на мал дел од илјадници договори кои секојдневно се нудат на Полимаркет. На платформата секој може да предложи официјален исход на договорот со полагање мал износ како залог. Ако постои несогласување, друг корисник може да оспори. Одлуката потоа се става на гласање на сопствениците на криптовалута наречена UMA, додека трговците дебатираат за доказите во јавната Дискорд (Discord) соба.

Некои трговци тврдеа дека договорот за прекин на огнот меѓу САД и Иран спаѓа под „привремен тактички прекин на борбата“, што не би се сметало според правилата на Полимаркет. Други посочија изјава на иранскиот министер за надворешни работи Абас Арагчи, кој кажа дека Иран ќе ги прекине своите „одбранбени операции“, тврдејќи дека не исклучил офанзивни маневри. Други договори на Полимаркет кои го следат датумот на примирјето дури до 31 декември веќе се решени во корист на прекин на огнот, што дополнително ја комплицира ситуацијата.

Корисниците на Полимаркет можат да тргуваат анонимно, бидејќи менувачницата не врши проверки на идентитетот, но нивната активност е видлива на веб-сајтот и во блокчејн трансакциите. Трговците можат да се обложуваат и преку повеќе налози, што значи дека загубите на други места не секогаш се веднаш видливи.

Предизвикот за идентификување на внатрешни активности на псевдоним платформа создаде нова индустрија на дигитални детективи. Постојат неколку карактеристики кои аналитичарите ги поврзуваат со внатрешно тргување - целосно нов налог со успешни облози концентрирани на само еден пазар обично се вклопува во овој опис.

Неодамнешна академска студија на Правниот факултет на Колумбија (Columbia Law School) и Универзитетот во Хаифа ги испита блокчејн записите на Полимаркет барајќи обрасци кои одговараат на користење нејавни информации, означувајќи трансакции кои генерирале околу 143 милиони долари профит во текот на две години. Истражувачите предупредија дека навремените трговии не се доказ за повластен пристап.

Тензии се гледаа и во средата, кога фирмата за блокчејн форензика „Баблмапс“ (Bubblemaps SA) истакна сет на сомнителни трговии, со ограничување дека можеби не биле направени од инсaјдери. Три налози кои точно предвидоа претходни напади врз Иран поставија нови облози на примирјето пред 15 април, што резултираше со профит од над 560.000 долари. Сепак, налозите немаат совршен ефект, бидејќи претходно губеле пари на слични пазари.

Самото примирје беше договорено во рок од неколку часа, што поставува прашање колку информации однапред можеле да имаат било кои лица надвор од мала група преговарачи.

„Не можеме со сигурност да кажеме дека овие налози се инсaјдерски“, наведоа од „Баблмапс“ во објава на социјалните мрежи. „Сепак, нивната историја на точно предвидување ненадејни напади врз Иран сугерира дека можеби имаат пристап до подобри информации од повеќето други корисници.“