Трамп: Примирјето со Иран веројатно нема да биде продолжено, Ормуз останува затворен без договор

Американскиот претседател Доналд Трамп изјави дека е „многу малку веројатно“ дека ќе го продолжи двонеделното примирје со Иран, доколку договор не биде постигнат пред неговото истекување, додавајќи дека Ормускиот теснец ќе остане блокиран додека не се финализира спогодба.

Трамп во телефонско интервју во понеделникот рече дека американскиот потпретседател Џеј Ди Венс подоцна во текот на денот ќе отпатува за да ги продолжи преговорите во Пакистан, за кои наведе дека треба да почнат во вторник. „Не сакам да ме брзаат, па да направам лош договор. Го имаме сето време на светот“, рече Трамп.

На прашање за примирјето, кое го најави на 7 април, тој рече дека е „многу малку веројатно“ да го продолжи, додавајќи дека истекува во среда. Прецизираше дека рокот завршува „во среда навечер по време во Вашингтон“.

Индексот S&P 500 падна на најниско ниво во текот на сесијата по коментарите на Трамп, пред подоцна делумно да ги ублажи загубите. Цените на нафтата го продолжија растот, при што двете референтни сорти поскапеа за повеќе од пет отсто. Инвеститорите внимателно следат како и кога протокот на енергенси низ теснецот значително ќе биде обновен.

Цената на суровата нафта порасна додека САД ја одржуваат блокадата на теснецот, а морнарицата заплени брод под иранско знаме. Сепак, Трамп остана непопустлив: „Не го отворам“.

„Сакаат да го отворам. Иранците очајнички сакаат да биде отворен. Нема да го отворам додека не се потпише договор“, додаде тој.

Техеран соопшти дека нема планови да учествува во можни преговори — чија цел е формално завршување на седумнеделниот судир — иако конечна одлука сè уште не е донесена, изјави портпаролот на Министерството за надворешни работи Исмаил Багаеи пред новинарите во понеделникот.

„Постојат различни показатели дека на американската страна нема сериозност за унапредување на дипломатијата“, истакна Багаеи.

Американскиот претседател наведе дека состанокот со Иран за мировните услови би можел добро да заврши за сите. Рече и дека би сакал лично да присуствува на разговорите, но не смета дека тоа е неопходно.

На прашањето дали очекува борбите веднаш да продолжат ако не биде постигнат договор, Трамп рече: „Ако нема договор, тоа секако би го очекувал“.

Иран го разгледува американскиот предлог доставен за време на посетата на началникот на пакистанската армија Асим Мунир, изјави Багаеи, според наводите на полуофицијалната Иранска студентска новинска агенција. Деталите од понудата не беа објавени.

i.