Шефот на дипломатијата на Иран слета во Пакистан пред доаѓањето на американските претставници, но изгледите и натаму се слаби за директни преговори за запирање на осумнеделната војна што ја потресува глобалната економија.
Министерот за надворешни работи Абас Арагчи ќе се сретне само со пакистански претставници за да ги пренесе иранските „ставови“, без планирани разговори со американската делегација, изјави портпаролот на иранското Министерство за надворешни работи во саботата.
Претседателот Доналд Трамп ќе ги испрати својот зет Џаред Кушнер и специјалниот пратеник Стив Виткоф на разговори во текот на викендот, изјави портпаролката на Белата куќа Каролин Левит во интервју за „Фокс њуз“ (Fox News) во петокот.
Арагчи претходно на социјалните мрежи објави дека целта на неговото патување е консултација со партнери за билатерални прашања. Тој се сретнал со началникот на пакистанската армија Асим Мунир, објави иранската полуофицијална агенција „Мер“ (Mehr), додека пакистанските медиуми наведуваат дека потоа ќе се сретне со премиерот и министерот за надворешни работи.
Сепак, Левит тврдеше дека Иранците стапиле во контакт со САД за организирање нова рунда разговори.
„Се надеваме дека тоа ќе биде продуктивен разговор и ќе ги придвижи работите напред кон договор“, рече Левит за „Фокс“.
Подоцна им изјави на новинарите дека САД „секако виделе одреден напредок од иранска страна во последните неколку дена“, без дополнителни објаснувања.
Потпретседателот Џеј Ди Венс, главен преговарач на САД, засега нема да патува во Пакистан, додаде таа.
Средбите во Исламабад доаѓаат по засилен американски притисок врз Исламската Република преку продолжување на поморската блокада насочена кон принудување на Техеран да прифати преговори за завршување на војната во која веќе загинаа повеќе од 5.000 луѓе, главно во Иран.
Трамп ѝ нареди на американската морнарица да отвори оган врз секој брод што поставува мини во Ормускиот теснец, откако војската пресретна два супертанкери за нафта кои се обиделе да ја избегнат блокадата.
Поради ограничувањата што одделно ги воведоа САД и Иран, стратешкиот поморски пат, низ кој пред војната минуваше една петтина од светската нафта и течен природен гас, и натаму е во застој.
Инвеститорите внимателно ги следат сигналите од секоја делегација додека ги проценуваат шансите за повторно отворање на Ормускиот теснец. Случувањата во петокот го поставија S&P 500 на пат кон најдолг неделен раст од 2024 година. Американската нафта падна под 94 долари за барел, додека Брент, меѓународната референтна нафта, се тргуваше над 105 долари за барел.
Американската блокада продолжува да врши притисок врз Ормускиот теснец
Bloomberg
Овој потег на Трамп, кој тврди дека Иран поставува морски мини во теснецот, е дел од обидот на Белата куќа да го прекине извозот на нафта од таа земја, економски да ја притисне и да ја принуди на отстапки во преговорите.
„Го имам сето време на светот, но Иран нема — часовникот отчукува!“, рече Трамп во објава на „Трут сошал“.
Министерот за одбрана Пит Хегсет во петокот изјави дека втор носач на авиони ќе ѝ се приклучи на блокадата за само неколку дена.
Сојузници на Трамп велат дека блокадата ќе го принуди Иран да почне да го намалува производството на нафта — негов главен извор на девизни приходи — во рок од околу две недели. Аналитичари на „ЏП Морган“ (JPMorgan Chase & Co.) изјавија дека на САД можеби ќе им биде потребен речиси еден месец за да ја постигнат таа цел.
Американската поморска операција натера многу бродови поврзани со Иран да се свртат назад наместо да минат низ Ормускиот теснец. Сепак, дел од нив и натаму минуваат, според податоци од компании што го следат движењето на бродовите, што потенцијално му дава можност на Иран подолго да ги издржи ограничувањата.
Супертанкер под американски санкции, натоварен со иранска нафта, според достапните податоци во петокот го запрел своето движење.
Белата куќа одобри продолжување од 90 дена на изземањето во поморскиот транспорт што го олеснува движењето на нафта, гориво и ѓубрива во рамки на САД, што е најнов обид да се ублажат нарушувањата во снабдувањето предизвикани од војната.
Дел од советниците на Трамп веруваат дека неговите остри и директни настапи на социјалните мрежи, како и продолжувањето на блокадата, ги намалуваат шансите за мировен договор со Иран, објави „Блумберг“ во четвртокот.
Ирански преговарачи изјавиле дека објавите на Трамп се насочени кон понижување на лидерите во Техеран и ги прават помалку подготвени за постигнување договор, според неколку претставници запознаени со дипломатските напори за завршување на војната.
Трамп доцна во четвртокот изјави дека Израел и Либан ќе го продолжат примирјето, кое требаше да истече во недела, со што се отстранува една пречка за завршување на војната со Иран.
Израел води војна против Хезболах, милитантна група во Либан поддржана од Иран. Трамп сака да избегне обновување на непријателствата во таа арапска земја, бидејќи Иран порача дека тоа е клучно за постигнување поширок мировен договор со САД.
.webp){kind=icon}
