Зеленски: Војната во Иран го остава Киев во неизвесност

Украина е во неизвесност, чекајќи продолжување на мировните преговори што би можеле да ја завршат војната со Русија, при што конфликтот во Иран претставува клучна пречка, според претседателот Володимир Зеленски.

Украина сè уште нема добиено нови сигнали од Русија или од САД за тоа кога преговорите би можеле повторно да започнат, додека американските пратеници Стив Виткоф и Џаред Кушнер сè уште размислуваат за посета на Киев, изјави Зеленски за „Блумберг Њуз“во телефонско интервју во четвртокот.

Заклучокот е дека нема нови индикации кога или каде би можеле да се одржат разговорите посредувани од администрацијата на претседателот Доналд Трамп, рече тој.

„Мислам дека сè зависи од тоа како ќе се развива ситуацијата на Блискиот Исток,“ рече Зеленски.

Целосната руска инвазија на Украина трае веќе петта година, а мировните преговори меѓу страните - кои дадоа мал напредок - застанаа во средината на февруари по последната рунда во Женева. Процесот подоцна беше нарушен од нападите на САД и Израел врз Иран.

Киев и Москва продолжија со размена на затвореници, додека главниот советник на Зеленски, Кирило Буданов, за „Блумберг“ овој месец изјави дека гледа напредок во разговорите и не очекува војната да трае уште долго. Сепак, целокупната ситуација не се подобри.

Претседателот Зеленски ги повика САД и Европа да ги задржат санкциите против Русија и да не подлегнат на обидите на Москва да ги ублажи.

„Мислам дека Русија може да го покрене прашањето за прекин на огнот во замена за укинување на санкциите за одредени претпријатија,“ рече Зеленски. „Знам дека тие го покренуваат прашањето за укинување на санкцијата за СВИФТ плаќања за да  можат да работат преку нивните банки. За Украина, сето тоа е голем ризик.“

Зеленски рече дека поканата за пратениците на Трамп, Виткоф и Кушнер, да го посетат Киев останува во сила. Иако тие сè уште не одговориле, се во контакт со нивните украински колеги по телефон, според Зеленски.

Во разговор со Трамп, рускиот претседател Владимир Путин во меѓувреме ја разгледувал можноста за краткорочен прекин на огнот со Украина околу 9 мај, ден кој Русија го одбележува како Ден на победата над нацистичка Германија во Втората светска војна.

Нема предлози

Сепак, Зеленски рече во интервјуто дека не добил никакви официјални или неофицијални предлози за тоа од Москва или Вашингтон. Тој рече дека им наложил на своите дипломати да се обратат до САД за детали пред да донесе одлука.

Многу земји, вклучително и Украина, одбележувањето за Втората светска војна го вршат на 8 мај, рече Зеленски, додавајќи дека останува нејасно на кој временски период Путин мисли за прекин на огнот.

Зеленски рече дека верува оти Кремљ бара еднодневен или неколкудневен прекин на огнот, главно за да ја заштити годишната воена парада во Москва од можни украински напади.
„Тие сакаат парадата да помине мирно неколку часа, а потоа да ги продолжат нападите,“ рече Зеленски. „Ние не сакаме никаков прекин на огнот да стане тактичка измама од страна на Руската Федерација.“

Во исто време, тој рече дека ги поддржува иницијативите за прекин на огнот што помагаат да се заштитат цивилите и да се олесни размената на затвореници.

 „Секогаш позитивно реагираме на вистински предлози за прекин на огнот со Русија, ако постојат,“ рече тој.