5.000 американски војници заминуваат од Германија

САД започнуваат повлекување на дел од своите сили од Европа, во потег што дополнително ги заострува односите со сојузниците и доаѓа во чувствителен момент поради војната со Иран.

Пентагон потврди дека по наредба на претседателот Доналд Трамп ќе бидат повлечени околу 5.000 американски војници од Германија. Одлуката, според Министерството за одбрана, е донесена по „темелна ревизија на военото присуство во Европа“ и ќе се реализира во наредните шест до дванаесет месеци.

Не е прецизирано дали дел од силите ќе бидат прераспределени во други европски земји, ниту дали намалувањето се однесува на постојани или ротирачки трупи. Во моментов, околу 35.000 американски војници се стационирани во Германија, која претставува клучен логистички и команден центар за американските операции, вклучително и оние поврзани со конфликтот со Иран.

Одлуката доаѓа по зголемените тензии меѓу Вашингтон и европските сојузници. Според американски медиуми, потегот е сигнал на незадоволството на Трамп од, како што смета, недоволната поддршка од Европа во воените напори на САД и Израел против Иран.

Дополнителен притисок создадоа и неодамнешните изјави на германскиот канцелар Фридрих Мерц, кој јавно ја критикуваше американската стратегија во конфликтот, оценувајќи дека администрацијата се соочува со неуспеси. Трамп, пак, претходно најави дека ја разгледува можноста за намалување на трупите во Германија.

Потегот веројатно ќе наиде на силен отпор во Конгресот. Демократскиот сенатор Џек Рид предупреди дека повлекувањето на илјадници војници „претставува сериозна грешка“ која може да има пошироки последици во време на активен конфликт.

Одлуката се толкува и како нов предизвик за НАТО, со оглед дека Трамп подолго време ги критикува сојузниците дека не издвојуваат доволно средства за сопствената одбрана. Во изминатиот период, тој влезе во низа несогласувања со европските лидери, вклучително и околу војните во Иран и Украина, како и иднината на Алијансата.

Германските власти засега реагираат воздржано. Министерот за надворешни работи Јохан Вадефул изјави дека Берлин „смирено ќе ја разгледа“ ситуацијата, нагласувајќи дека американските бази во Германија остануваат од клучно значење за операциите на САД. Германија, меѓу другото, обезбедува простор за базите без надомест, како и логистичка поддршка за американските сили.

Германскиот министер за одбрана, Борис Писториус, изјави дека Европа мора да преземе поголема одговорност за безбедноста во регионот, нагласувајќи ја континуираната важност на споделените воени интереси со САД.

Коментарите на Писториус дојдоа како одговор на одлуката на администрацијата на Трамп во петокот да повлече околу 5.000 војници од Германија.

Наредбата беше „предвидлива“, изјави Писториус за новинската агенција ДПА во саботата, додавајќи дека „ние Европејците мора да преземеме поголема одговорност за нашата безбедност“.

„Присуството на американски војници во Европа, а особено во Германија, е во наш интерес и во интерес на САД“, изјави министерот. „Тесно соработуваме со Американците - во Рамштајн, во Графенвер, во Франкфурт и на други места - за мир и безбедност во Европа, за Украина и за заедничко одвраќање“.

САД во голема мера се потпираа на својата широка мрежа од бази и други објекти во Германија, наследство од Студената војна, за подготовка и започнување операции против Иран. Но тензиите ескалираа неделава кога Мерц го критикуваше Трамп за справувањето на војната во Иран со невообичаено директни зборови, велејќи дека неговата администрација е „понижена“.

 

 

*Ажурирано со изјавата на германскиот министер за одбрана, Борис Писториус.