„Целосно неприфатлив“: Трамп го одби одговорот на Иран

Американскиот претседател Доналд Трамп и Иран ги отфрлија меѓусебните најнови мировни предлози за ставање крај на 10-неделниот конфликт, додека двете страни се мачат да го одржат кревкиот прекин на огнот.

„Штотуку го прочитав одговорот од таканаречените ирански ‘претставници’“, напиша тој на социјалните мрежи, нарекувајќи го „ЦЕЛОСНО НЕПРИФАТЛИВ“. Американскиот долар ги продолжи добивките во однос на другите водечки валути по коментарите на Трамп.

Иран понудил дел од своите резерви на високо збогатен ураниум да ги префрли во трета земја, но ја отфрлил идејата за демонтирање на своите нуклеарни постројки, објави претходно „Волстрит журнал“. Иран го оспори извештајот, според полуофицијалната новинска агенција „Тасним“.

Не е јасно дали размената на предлози ќе понуди пат за повторно отворање на Ормускиот теснец.

Според најновиот предлог, Иран би разредил дел од својот високо збогатен ураниум, а остатокот би бил испратен во трета земја, објави весникот, повикувајќи се на лица запознаени со одговорот. Но, во предлогот исто така се бара гаранција дека префрлениот ураниум ќе биде вратен доколку разговорите пропаднат и се исклучува можноста за демонтирање на постројките.

Полуофицијалната иранска новинска агенција „Тасним“ соопшти дека известувањето на „Волстрит журнал“ за предлозите поврзани со нуклеарниот материјал „не е точно“. Во соопштението беше нагласена желбата на Иран за итен крај на војната, ослободување на замрзнатите средства, укинување на американските санкции за продажба на нафта, крај на американската блокада на Оманскиот Залив и, на крајот, иранско управување со теснецот. Државната телевизија „ИРИБ њуз“ додаде дека Техеран го отфрлил планот на Трамп бидејќи претставува капитулација и инсистирал САД да платат и воена отштета.

Трамп предложил Иран да дозволи премин низ Ормускиот теснец, а Вашингтон да ја прекине блокадата на иранските пристаништа во следниот месец, по што би следувале нуклеарни разговори.

Нафтата поскапе откако Трамп го отфрли најновиот ирански предлог. Брент порасна за околу 3,5 отсто, на над 104 долари за барел, надоместувајќи дел од загубите од минатата недела. Фјучерсите на американските берзански индекси благо се намалија бидејќи застојот негативно влијаеше врз расположението на инвеститорите кон ризичните средства.

Претходно во неделата, Трамп напиша на социјалните мрежи дека Иран „си игра игри“ со САД и со другите земји. „Повеќе нема да се смеат!“

Трамп и неговите советници повеќепати сугерираа дека војната е завршена, иако истовремено се закануваа со ескалација на нападите доколку Техеран не се согласи на мировен договор. Тој оваа недела треба да отпатува во Кина и покрај конфликтот што сè уште трае.

Претседателот повеќепати изјави дека на Иран не смее да му биде дозволено да поседува нуклеарно оружје и тврдеше уште минатата недела дека земјата веќе се согласила да се откаже од своите нуклеарни амбиции.

Претседателот во објавата на социјалните мрежи не наведе какви би биле последиците, доколку ги има, од неговото незадоволство од иранскиот одговор. Во последните недели Трамп изгледаше нетрпелив да стави крај на конфликтот, додека се соочува со растечки политички притисок да ги намали цените на горивата низ САД пред ноемвриските избори на средина од мандатот, на кои неговите републиканци се надеваат дека ќе ја задржат контролата врз Конгресот.

Конфликтот однесе илјадници животи низ Блискиот Исток и ги наруши пазарите на нафта и гас, додека наглиот раст на цените на горивата врши дополнителен притисок врз владите и потрошувачите ширум светот.