Шји повика на прекин на војната во Иран, Путин повеќе насочен кон билатералната соработка

Кинескиот претседател Шји Џјинпинг и неговиот руски колега Владимир Путин во Пекинг потпишаа повеќе од 20 договори, како и декларација за „мултиполарен светски поредок“.

Според информациите што ги пренесе „Би-би-си“, договорите опфаќаат трговија, енергетика, технологија и изградба на железничка инфраструктура.

Разговорите меѓу двајцата лидери во Големата сала на народот го опфатија и Блискиот Исток, објави државната новинска агенција „Синхуа“, при што Шји ја нагласи итноста на неговите претходни повици за прекин на огнот во конфликтот што започна со американско-израелското бомбардирање на Иран, а потоа се прошири низ регионот. 

Неколку часа претходно американскиот претседател Доналд Трамп, кој и самиот одржа самит со Шји минатата недела, се закани дека во наредните денови повторно ќе започне напади врз Иран како дел од напорите за постигнување договор за завршување на војната.

„Сеопфатен прекин на огнот е неопходен, повторното започнување на војната е уште понеприфатливо, а придржувањето кон преговорите е особено важно“, изјави Шји во Пекинг во средата.

Претходно истиот ден тој го пречека Путин на плоштадот „Тјенанмен“, приредувајќи му ист третман каков што неколку дена претходно доби и Трамп. Одекна поздрав со 21 топовски истрел додека воен оркестар ги свиреше двете национални химни, а десетици деца што држеа руски и кинески знамиња ги поздравуваа со извици: „Добре дојдовте, добре дојдовте“.

Во своето воведно обраќање пред разговорите, Путин му рече на Шји дека руско-кинеските односи се на невидено високо ниво и претставуваат модел на партнерство.

Нарекувајќи го Шји „драг пријател“, Путин изјави дека Русија останува сигурен снабдувач со енергија за Кина. „Во сегашната напната ситуација на меѓународната сцена, нашата блиска соработка е особено потребна“, рече тој.

Како што пренесува „Би-би-си“, Путин ќе настојува дополнително да ги зајакне односите со Кина, која е најголем купувач на руска нафта. Нов гасовод што би можел да испорачува до 50 милијарди кубни метри природен гас за Кина е високо на агендата.

Кинескиот претседател изјави дека нивните односи се развиле затоа што двете страни работат на продлабочување на политичката доверба и стратешката координација.

Според аналитичарите на „Би-би-си“, Пекинг е повнимателен во својот речник затоа што Шји сака да изгледа дека е близок со Москва, но не премногу близок.

„Кина и Русија треба да се фокусираат на долгорочни стратегии и да ги промовираат развојот и обновата на своите земји“, изјави Шји, според Кинеската централна телевизија (ЦЦТВ). Тој додаде дека нивните држави треба и да „изградат поправеден и поразумен систем на глобално управување“ во услови на „распространета еднострана хегемонија“, што, според државниот медиум, претставувало прикриена критика кон САД.

Путин и Шји, кои имаат силна меѓусебна врска и заедничка желба за мултиполарен светски поредок што би ја предизвикал глобалната доминација на САД, главните разговори ги одржуваат денеска, додека заедно пијат чај. Кинеското Министерство за надворешни работи соопшти дека ова е 25-та посета на рускиот лидер на земјата.

Формално организирана по повод 25-годишнината од договорот за пријателство и соработка меѓу Русија и Кина, посетата на Путин доаѓа веднаш по самитот на Шји со Трамп во Пекинг минатата недела.