Израел и Либан се согласиле на прекин на огнот. Што е со Хезболах?

САД соопштија дека Израел и Либан се согласиле на прекин на огнот доколку и Хезболах престане да дејствува, што претставува најнов обид на администрацијата на Трамп да ги одржи мировните разговори со Иран на вистинскиот пат додека политичкото противење на војната се засилува.

Белата куќа соопшти дека договорот меѓу Израел и Либан бил условен со „целосен прекин“ на нападите од страна на Хезболах, милиција поддржана од Иран, додавајќи во соопштението дека групата мора да ги евакуира сите свои оперативци од либанската територија јужно од реката Литани, во близина на границата со Израел.

„Израел и Либан потврдија дека немаат непријателски намери еден кон друг и се обврзаа да продолжат со директни преговори за градење доверба, решавање на сите преостанати прашања и работа кон сеопфатен договор меѓу двете земји“, се наведува во соопштението.

Немаше непосредна назнака дали Хезболах ги прифатил условите од договорот. Претседателот Доналд Трамп оваа недела изјави дека разговарал со „високопозиционирани претставници“ на Хезболах и дека тие се согласиле целосно да престане пукањето меѓу групата и Израел.

Нафтата брент во четвртокот поевтини за 0,7 отсто, на 97,10 долари, за барел, додека фјучерсите на американските државни обврзници благо пораснаа.

Во Вашингтон, Трамп претрпе удар кога Претставничкиот дом на САД, предводен од републиканците, во средата изгласа запирање на американската војна, нагласувајќи ги политичките грижи околу непопуларниот странски конфликт, кој има сè поголемо економско влијание врз Американците - пет месеци пред изборите што ќе одлучат кој ќе го контролира Конгресот.

Гласањето во Претставничкиот дом нема да ја заврши американската воена кампања против Иран, но претставува најново во низата назадувања за претседателот, кој во поголемиот дел од својот втор мандат го држеше Конгресот под своја контрола.

Иран побара Израел да ги запре нападите врз цели на Хезболах во Либан како дел од кој било договор со САД за решавање на регионалната војна, која фактички го затвори Ормускиот Теснец. Нарушувањето предизвика нагло зголемување на глобалните цени на енергентите и поттикна инфлација, намалувајќи ја куповната моќ на Американците пред ноемвриските избори, кои би можеле да одлучат дали републиканците ќе ја задржат контролата врз Конгресот.

Објавата за прекин на огнот следуваше по неколкудневната ескалација на израелските воени активности против Хезболах во Либан, што доведе до телефонски разговор меѓу Трамп и израелскиот премиер Бенјамин Нетанјаху. За време на разговорот, Трамп наводно користел пцости додека вршел притисок врз Нетанјаху да ја намали ескалацијата на борбите и да ги одржи мировните разговори со Иран на вистинскиот пат.

Лидерите дадоа различни верзии за тоа што било договорено - при што американскиот претседател првично сугерираше пошироко примирје отколку што неговиот соговорник беше подготвен јавно да објави.

Овој настан повторно го насочи вниманието кон еден аспект од војната што Трамп во голема мера одбиваше да го признае: САД и Израел имаат различни гледишта за тоа како треба да изгледа нејзиниот крај. Тоа несогласување ги загрозува кревките и долготрајни преговори меѓу Вашингтон и Техеран, при што Иран инсистира Либан да биде дел од секој мировен договор.

„Бев малку вознемирен од неговото постојано војување со Либан“, изјави Трамп во интервју за поткастот ПФО (Pod Force One), емитувано во средата.

Весникот „Волстрит журнал“ објави дека Трамп приватно им кажал на своите советници дека би размислил за прекинување на примирјето со Иран доколку Техеран убие американски војници. Сепак, претседателот не е расположен повторно да го разгорува конфликтот и би можел да ги игнорира помалите инциденти со недели за да избегне поширока регионална војна, објави весникот, повикувајќи се на неименувани американски претставници.

САД и Иран во изминатите неколку дена разменија ограничени напади, што претставува најсериозно влошување на состојбата откако примирјето стапи во сила во април. Најновите напади се прелеаја и во Бахреин и Кувајт, каде што најмалку едно лице беше убиено во напад врз цивилниот аеродром во Кувајт, кој предизвика значителна штета и принуди привремено запирање на летовите на неколку часа.

Претходно во средата Трамп разговарал со емирот на Катар, шеикот Тамим бин Хамад ел Тани, според државната новинска агенција на Катар, при што емирот ја нагласил „важноста од давање приоритет на политичките и дипломатските решенија и дијалогот меѓу сите страни“.