Израел и Иран во напади против мирот, битката се разгорува

Обновениот конфликт ги загрозува изгледите за мир и на други места во регионот. Уредниците на „Блумберг“ пишуваат дека откако САД и Иран започнаа преговори за крај на војната, Израел инсистираше дека ниеден договор нема да го опфати неговиот конфликт со Хезболах. Иран се обиде да го задржи Хезболах под својот безбедносен чадор, додека Трамп му даде приоритет на обезбедувањето договор.

Либанската влада и Израел минатата недела се согласија на прекин на огнот, но тоа беше одбиено од Хезболах. Милитантната група поддржана од Иран со седиште во Либан, која не е страна во преговорите, рече дека примирјето претставува предавање. Во неделата нападите „око за око“ меѓу Израел и Хезболах продолжија, што го натера Иран да започне свои напади во одбрана на милитантната група.

Израел го нападна Либан како одговор на нападите на Хезболах. Израелските одбранбени сили веќе издвоија „безбедносна зона“ надвор од границата и го контролираат пристапот до област што се протега 10 километри во Либан.

По израелските напади врз петрохемиската компанија „Карун“ во текот на денот, Иран предупредува дека ќе возврати со слични напади на Блискиот Исток.

Сите нафтени и гасни капацитети поврзани со Израел, САД и нивните сојузници - вклучувајќи ги и регионалните енергетски локации - ќе бидат цел на нападите врз енергетската инфраструктура на Иран, соопшти полуофицијалната новинска агенција „Фарс“. Иран упати слични закани пред почетокот на сегашниот прекин на огнот на 8 април, но се воздржа од спроведување во неколку наврати.

Инаку, во текот на оваа година се можни избори во Израел. Премиерот Бенџамин Нетанјаху е под притисок да покаже дека е најдобрата личност за заштита на земјата - од повторување на нападот на Хамас од октомври 2023 година, од Хезболах на север и од Иран. Тоа веројатно ќе доведе до поагресивен став кон напади како најновиот.

Нетанјаху исто така ќе биде заинтересиран да ги отфрли критиките од опозицијата дека неговиот посебен однос со Трамп го навел да се откаже од дел од суверенитетот на земјата и да го претвори Израел во клиент на САД.
Во неодамнешна епизода Трамп го прекори Нетанјаху - користејќи и пцости - за планот за дејствување против цели на Хезболах во Бејрут.

Една важна точка е како САД реагираат на најновите случувања, бидејќи тоа ќе даде навестување за потенцијалот за дипломатски пат за излез од најновата пресметка „око за око“. Извештајот на „Аксиос“ дека Нетанјаху одговорил на ракетните напади на Иран и покрај барањето на Трамп да се воздржи, може да биде знак на дивергенција меѓу сојузниците. Исто така, зборува за нивните различни цели.

Трамп - соочен со сè понепопуларна војна - е под притисок да постигне договор што ќе овозможи крај на борбите и нормализирање на бродскиот сообраќај низ Ормускиот Теснец. Речиси целосното затворање на водниот пат - низ кој течеше една петтина од светската нафта пред војната - доведе до скок на цените на бензинот во САД и предизвика страв од инфлаторен бран. 

Израел и Иран во понеделникот разменија ракетни напади и покрај повиците на претседателот Доналд Трамп до двете страни да престанат со борбите и да им дадат шанса на мировните преговори.

Иран започна нов бран напади само неколку часа откако истрела балистички ракети кон Израел во неделата. Израел одговори со напади врз воени цели во западен и централен Иран, додека иранските државни медиуми објавија повеќекратни експлозии во главниот град Техеран.