Трамп: Нападите ќе продолжат многу силно сè додека Иран не попушти

САД во средата извршија нови воздушни напади врз Иран, а претседателот Доналд Трамп најави дека бомбардирањето ќе продолжи сè додека Техеран не престане да напаѓа бродови во Ормускиот Теснец и не го отвори клучниот поморски премин.

Американската војска ги нападна складиштата и лансирните позиции за ракети на островот Голем Тунб, во близина на Ормускиот Теснец, во операција што траела 90 минути. Според Вашингтон, нападите дополнително ја намалиле способноста на Иран да ги загрозува трговските бродови.

Ова е петти последователен ден на американски напади. Претходно САД нападнаа повеќе воени цели, по што Иран возврати со напади врз американски бази во Кувајт и Бахреин.

Привремениот мировен договор меѓу САД и Иран, постигнат пред околу еден месец, практично пропадна поради спорот околу контролата врз Ормускиот Теснец, преку кој поминува најголемиот дел од енергетскиот извоз на Саудиска Арабија, Катар и Обединетите Арапски Емирати. Како последица, цената на нафтата брент трет ден по ред расте и надмина 85 долари за барел.

Откако Иран почна да напаѓа бродови за кои тврди дека пловат без негова дозвола, Трамп повторно воведе поморска блокада кон Иран и најави нови напади.

„Ќе ги погодиме многу силно и утре и следната вечер. Следната недела ситуацијата ќе стане уште полоша бидејќи на ред ќе дојдат електраните. Ќе ги уништиме сите нивни мостови ако не седнат на преговарачка маса“, изјави Трамп за „Фокс њуз“, додавајќи дека енергетската инфраструктура ќе биде „оставена за крај“.

Двете страни меѓусебно се обвинуваат за прекршување на договорот, кој требаше да обезбеди слободна пловидба низ Ормускиот Теснец и да отвори преговори за иранската нуклеарна програма. Наместо тоа, разговорите се во застој.

Иран не покажува знаци на повлекување. Исламската револуционерна гарда соопшти дека Ормускиот Теснец ќе остане затворен сè додека САД не ги прекинат нападите и поморската блокада, порачувајќи дека „извозот на нафта и гас ќе биде достапен или за сите, или за никого“.

Меѓународната поморска организација предупреди дека Ормускиот Теснец останува премногу опасен за трговските бродови, додека европскиот регулатор за воздухопловна безбедност ги повика авиокомпаниите да избегнуваат летови над Бахреин, Кувајт, Катар, Обединетите Арапски Емирати и Оманскиот Залив.

Иран соопшти дека во последните денови во американските напади загинале повеќе од 30 цивили, а седум лица биле убиени при напад врз касарна во Ираншахр.

Во меѓувреме, Трамп се откажа од најавената такса од 20 проценти за товарните бродови што минуваат низ Ормускиот Теснец, по барање на арапските сојузници на САД. Наместо тоа, најави дека Вашингтон ќе се потпре на трговски и инвестициски договори со земјите од Заливот, но поморската блокада кон Иран останува во сила.

Ормускиот Теснец, преку кој пред почетокот на конфликтот минуваше околу една петтина од светската трговија со нафта и течен природен гас, останува главната точка на судир меѓу Вашингтон и Техеран.