Трамп, Шејнбаум и Карни на иста трибина на „Мат Лајф“: Домаќините заедно ќе го следат финалето на Мундијалот

Мексиканската претседателка Клаудија Шејнбаум и канадскиот премиер Марк Карни ќе отпатуваат во САД за да присуствуваат на неделното финале на Светското првенство, на покана од претседателот Доналд Трамп, што создава можност за ресетирање на односите по еден месец исполнет со регионални тензии.

Шејнбаум, обраќајќи им се на новинарите во видеопорака објавена од претседателскиот кабинет, рече дека добила „директна покана“ од Трамп да присуствува на фудбалскиот натпревар. Таа најави дека во сабота ќе објави порака со повеќе детали за патувањето и дека во Мексико ќе се врати во понеделник наутро.

„Ги резервиравме билетите“, рече Шејнбаум, мислејќи на авионските билети. Натпреварот ќе почне во 15 часот на стадионот „Мет Лајф“ (MetLife Stadium) во Њу Џерси.

Шејнбаум веќе имаше судири со Трамп околу третманот на имигрантите во САД, каде што повеќе мексикански државјани починаа додека беа во притвор. На состанокот во петокот, Мајкл Козак, највисокиот претставник на Стејт департментот за прашања поврзани со западната хемисфера, ги врати писмата на Мексико поврзани со овие смртни случаи, препорачувајќи земјата да ги користи дипломатските канали. Мексико соопшти дека ќе продолжи да се залага за своите државјани што се наоѓаат во притвор под надлежност на американските имиграциски власти.

Мексико и САД продолжуваат да работат и на трговски договор, откако Трамп на почетокот од месецов дозволи да истече автоматското обновување на регионалниот договор за слободна трговија. Третата рунда преговори ќе почне во вторник во Мексико Сити, додека Канада направи чекор назад во преговорите.

Трамп во петокот изјави дека планира да разговара со Карни за чадот од шумските пожари што се движи кон југ, додавајќи дека загадувањето ги чинело САД милијарди долари и дека тоа треба да се одрази во царините за Канада.

Средбата меѓу Шејнбаум и Трамп ќе биде нивна прва од декември, кога двајцата, заедно со Карни, се сретнаа на жрепката за Светското првенство во Вашингтон.

Ова ќе биде првиот натпревар од турнирот на кој ќе присуствува Шејнбаум. Таа ја подари својата влезница за отворањето на турнирот во Мексико Сити на млад љубител на фудбалот.

Според нејзината официјална агенда, Шејнбаум првично планирала во недела да отпатува во Канкун за да одржи прес-конференција.