text size
Претседателот на Србија, Александар Вучиќ, ќе биде кандидат на Српската напредна странка (СНС) за претседател на Владата на Србија на претстојните вонредни парламентарни избори, одлучи едногласно Главниот одбор на СНС на седница одржана во Ниш.
СНС на изборите ќе настапи со листата „Александар Вучиќ – Обединета Србија“, а Вучиќ ќе биде носител на листата и прв на неа.
Вучиќ во неодамнешно интервју за ТВ Ниш изјави дека изборите ќе ги распише за неколку дена, најдоцна на 9 или 10 септември наутро. Изјавата следуваше откако претходно оваа недела неофицијални најави укажаа дека парламентарните избори во Србија ќе се одржат на 25 октомври.
Доколку по изборите добие поддршка за формирање влада, Вучиќ рече дека новиот владин состав би имал најмногу 12 министри.
„Мојот предлог ќе биде премиер и најмногу 12 министри. Значи, тоа да биде најмалата влада во нашата историја“, изјави Вучиќ.
Вучиќ го започна својот втор претседателски мандат на 31 мај 2022 година, што значи дека неговиот редовен мандат би траел до 31 мај 2027 година. Доколку пред тоа биде избран за премиер, неговиот претседателски мандат би престанал пред истекот на тој рок.
Според член 120 од Уставот на Србија, во случај на престанок на мандатот на претседателот на Републиката пред истекот на периодот за кој е избран, претседателската должност до изборот на нов претседател ја врши претседателот на Народното собрание. Нов претседател на државата мора да биде избран во рок од три месеци.
Изборни рокови
Вонредните парламентарни избори во Србија ги распишува претседателот на државата, истовремено со распуштањето на Народното собрание. Од денот на распишувањето до денот на гласањето мора да поминат најмалку 45, а најмногу 60 дена. Целиот изборен процес го спроведуваат Републичката изборна комисија, локалните изборни комисии и избирачките одбори. Право да избираат и да бидат избрани за народни пратеници имаат полнолетни државјани на Србија кои не се целосно лишени од деловна способност.
Тоа значи дека 10 септември е крајниот рок за распишување на изборите, кои би се одржале на 25 октомври. По распишувањето почнуваат да течат роковите за спроведување на изборните дејствија, вклучувајќи го поднесувањето изборни листи и собирањето потписи за поддршка.
Кандидатури можат да поднесуваат политички партии, коалиции и групи граѓани, со обврска да соберат најмалку 10.000 заверени потписи од избирачи, додека за изборните листи на националните малцинства потребни се 5.000 потписи. Секоја листа може да има до 250 кандидати, при што законот предвидува родова рамноправност, односно најмалку 40 проценти од помалку застапениот пол да бидат распоредени на секои пет места на листата.
Ова ќе бидат 15-ти парламентарни избори во Србија од воведувањето на повеќепартискиот систем во 1990 година. Од досегашните 14 изборни циклуси, 10 биле распишани како вонредни избори.
Претходните, исто така вонредни парламентарни избори, се одржаа на 17 декември 2023 година. На нив листата „Александар Вучиќ – Србија не смее да застане“ освои 129 од вкупно 250 пратенички мандати.
.webp){kind=icon}
