По Трамп, и ЕУ се пишмани: 90 дена пауза за царините кон САД

Европската Унија ќе го одложи за 90 дена спроведувањето на своите контратарифи против САД поради давачките од 25 отсто што претседателот Доналд Трамп ги наметна минатиот месец за извозот на челик и алуминиум од Европа.

ЕУ ќе продолжи со тарифите што ќе погодат околу 21 милијарда евра (23,2 милијарди американски долари) вредни американски стоки, а потоа веднаш ќе ги суспендира кога ќе стапат во сила, според луѓе запознаени со ова прашање, кои зборуваа за „Блумберг“ под услов да останат анонимни.

Потегот доаѓа само неколку часа откако Трамп објави 90-дневна пауза пред да биде поставена „реципрочна“ царина од 20 отсто што ќе го погоди речиси целиот извоз на ЕУ. Таа стапка сега ќе биде 10 отсто.

Претседателката на Европската комисија, Урсула фон дер Лајен, рече дека сака да им даде шанса на преговорите со САД.

„Ако преговорите не се задоволителни, нашите контрамерки ќе започнат“, напиша таа на X. „Подготвителната работа за понатамошни контрамерки продолжува. Како што реков претходно, сите опции остануваат на маса“.

Покрај царините од 25 отсто за извозот на челик и на алуминиум од ЕУ, САД ги погодија автомобилите произведени во ЕУ, како и некои автоделови, со давачка од 25 отсто. Трамп рече дека ќе објави дополнителни царини за дрвната граѓа, полупроводничките чипови и фармацевтските производи.

Трамп постојано ја напаѓа ЕУ, најголемиот трговски партнер на САД, велејќи дека таа е формирана за да ги „зафркне“ САД и дека суфицитот на блокот во трговијата со стоки е доказ за нефер однос. Според податоците на Светската трговска организација, просечната стапка на трговска пондерирана царина на ЕУ за увозот од САД била 2,7 отсто во 2023 година.

„Тие смислуваат правила и прописи што се дизајнирани само поради една причина: да не можете да го продавате вашиот производ во тие земји“, рече Трамп во текот на неделава. „И ние нема да дозволиме да се случи тоа“.