Зеленски најави дека в понеделник ќе отпатува за Вашингтон на средба со Трамп

Украинскиот претседател Володимир Зеленски изјави дека во понеделник ќе отпатува во Вашингтон за да се сретне со својот американски колега Доналд Трамп за да разговараат за крај на руската инвазија.

„Украина уште еднаш потврдува дека е подготвена продуктивно да работи за постигнување мир“, рече Зеленски во објава на социјалните мрежи по днешниот телефонски разговор со Трамп. „Ние го поддржуваме предлогот на претседателот Трамп за одржување трилатерален состанок Украина-САД-Русија“.

Сепак, Зеленски повтори дека и Европа треба да биде дел од разговорите.

Трамп ја потврди посетата на украинскиот претседател на Вашингтон во објава на Трут сошал и рече дека може да се закаже средба со Путин и Зеленски „доколку сè се одвива како што треба“.

Bloomberg Mercury

 

Освен Зеленски, денеска и европските лидери разговараа со Трамп додека американскиот претседател се враќаше од состанокот во Алјаска со Путин, што се одржа доцна синоќа по наше време, а кои не успеаја да донесат решение за прекин на војната која трае веќе три и пол години.

Трамп рече дека иако Украина е таа што треба да одлучи што да прави со својата територија, ставот на Путин не се променил - тој сè уште сака Киев да ја отстапи контролата врз целиот регион Донбас на истокот од Украина, според луѓе запознаени со ова прашање кои зборуваа под услов на анонимност.

Зеленски постојано ја отфрла можноста да се откаже од цел Донецк и Луганск, кои московските сили ги контролираат само делумно и досега не успеаја воено да ги преземат. Русија ќе престане да ги промовира своите претензии врз деловите од Запорожје и регионот Херсон што сега не ги контролира, ефикасно замрзнувајќи ги бојните линии таму, рекоа луѓето.

Трамп им рекол на европските лидери дека е подготвен да се заложи за гаранции за безбедноста на Украина сè додека тоа не го вклучува НАТО, додадоа тие. Претседателот сугерираше дека Путин би бил во ред со тоа, рекоа луѓето.

Bloomberg

 

Американскиот претседател во објавата рече дека неговата средба со Путин и повикот со Зеленски поминале „многу добро“. Трамп напиша дека „сите одлучиле“ дека најдобриот начин да се стави крај на војната е да се постигне мировен договор, а не само договор за прекин на огнот.

 

Ваквиот сплет на настани следува откако Трамп го префрли тежиштето за крај на воениот спор на украинскиот претседател по тричасовната средба што претходно ја оствари со рускиот претседател Владимир Путин во Алјаска. Тој иако ја окарактеризира средбата како исклучително продуктивна, сепак рече дека нема договор додека не се постигне договор, напоменувајќи дека ќе разговара со Зеленски и дека ќе иницира заедничка трилтерална средба.