Лагард: Претседателството на Франција е „ужасна работа“ – не е за мене

Кристин Лагард ги отфрли шпекулациите дека има амбиции да стане следниот претседател на Франција.

„Мислам дека тоа е ужасна работа – и мора да бидеш некако создаден за такво нешто, а мислам дека јас навистина не сум“, изјави шефицата на Европската централна банка во поткастот „Финансиски лидери од академската заедница“ (College Leaders in Finance), одговарајќи на прашањето дали би ја прифатила таа функција.

Нејзиниот осумгодишен мандат во Франкфурт трае до октомври 2027 година. Мандатот на Емануел Макрон како претседател на Франција завршува истата година, но неколку месеци порано.

„Тоа не значи дека не сакам да ѝ служам на својата земја, ниту дека не сакам да ѝ служам на Европа. Не значи дека ќе бидам себична кога ќе се повлечам, но мислам дека тоа е исцрпувачка работа за која треба да си малку луд за да ја посакаш“, рече Лагард во интервјуто што беше емитувано во неделата.

На прашањето како се чувствува што ја поврзуваат со највисоката политичка функција во Франција, таа рече: „Чувството е многу убаво, покажува дека луѓето имаат доверба во мене. Прекрасно е, навистина е ласкаво, но морам да бидам внимателна и трезвено да ги согледам своите ограничувања“

Запрашана за нејзините планови по завршувањето на мандатот во ЕЦБ, Лагард одговори неодредено.
„Постојат многу други работи што би сакала да ги правам“, рече таа. „Не би го нарекла пензионирање. Но тоа би било нешто поинакво, можеби повеќе поврзано со она што навистина ме интересира и ми е важно. Не се гледам како седам пред телевизор или патувам без некоја цел – тоа едноставно не е за мене.“

Сепак, таа призна дека очекува да има „повеќе време за себе“, како и „за внуците и за семејството, кои не ги гледа доволно“, додаде таа.