Кина тврди дека има докази за американски сајбер напад врз државна агенција

Кина соопшти дека открила „неоспорни докази“ за кибер напади од страна на американската влада врз главната агенција во земјата одговорна за мерење на времето.

Американската агенцијата за национална безбедност (НСА) ја искористила ранливоста во мобилните телефони на некои вработени во Националниот центар за услуги за време за да ги нападне уредите и да добие чувствителни информации почнувајќи од 25 март 2022 година, пишува во соопштението објавено денеска на официјалната Вичет (Wechat) страница на кинеското Министерство за државна безбедност.

Шпионската агенција на САД, најголемата во земјата специјализирана за сигнална разузнавачка служба, од 18 април 2023 година постојано користела украдени податоци за пристап и најавување за да ги хакира компјутерите во центарот, соопшти министерството.

НСА не одговори веднаш на барањето за коментар, инаку испратено надвор од работното време.

Обвинувањата следат по повторените обвинувања од западните влади и компании во последниве години, во кои тие ги обвинуваат кинеските хакери за кибер нападите врз нивните компјутерски системи. Сето ова се случува во време кога ескалираа тензиите околу трговијата меѓу САД и Кина.

Кинескиот центар за временски услуги, кој се наоѓа во северозападниот град Сиан, е витален национален објект кој обезбедува високопрецизни услуги за владата, граѓанското општество и различните индустрии. Исто така, нуди важна поддршка за податоци за пресметување на меѓународното стандардно време.

Кинеските национални безбедносни власти соопштија дека истрагите покажале дека за прикривање на изворот на нападите биле користени приватни сервери низ целиот свет. Пекинг веќе презел мерки за заштита од хакерските напади, како и превентивни чекори во центарот за временски услуги, се вели во соопштението.