Кина ја запира контролата на извозот на некои од ретките метали

Кина е ги суспендира дополнителните извозни контроли за ретки земни метали и ќе ги прекине истрагите насочени кон американски компании во синџирот на снабдување со полуспроводници, соопшти Белата куќа.

Во саботата, Белата куќа објави информативен документ со некои детали од трговскиот договор постигнат претходно оваа недела меѓу претседателот Доналд Трамп и кинескиот лидер Шји Џјинпинг, со цел да се намалат тензиите меѓу двете најголеми економии во светот.

Според договорот, Кина ќе издаде општи лиценци за извоз на ретки земни метали, галиум, германиум, антимон и графит „во корист на американските крајни корисници и нивните добавувачи ширум светот“, со што ефективно ќе се укинат контролите што Кина ги воведе во април 2025 и октомври 2022. Претходно, САД и Кина соопштија дека Пекинг ќе ги суспендира порестриктивните контроли објавени во октомври 2025 за период од една година.

Вашингтон, исто така, ќе паузира дел од т.н. реципрочни царини на Трамп кон Кина за дополнителна една година и ќе ги запре плановите за воведување 100 отсто царина на кинескиот извоз во САД, која беше најавена за ноември. Белата куќа додаде дека САД ќе го продолжат и рокот на важноста на одредени исклучоци од царините според Секција 301, кои требаше да истечат на 29 ноември 2025, до 10 ноември 2026.

Амбасадата на Кина во Вашингтон не одговори веднаш на барањето за коментар во саботата.

Историскиот самит меѓу Трамп и Шји, нивната прва средба лице в лице во вториот мандат на американскиот претседател, доведе до краткорочна стабилизација на односите по ескалацијата на трговскиот конфликт што ги потресе пазарите и предизвика страв од глобална рецесија.

Според Белата куќа, Кина се согласила да ги паузира сеопфатните контроли за магнети од ретки земни метали во замена за договор од САД да ги повлече проширените ограничувања за кинеските компании. Кина ја користеше својата доминација во преработката на ретки земни минерали како средство за притисок, заканувајќи се дека ќе го ограничи нивниот извоз кон САД и сојузничките земји.

САД, исто така, се согласија да ја преполоват царината поврзана со фентанил од 20 на 10 отсто, додека Пекинг ќе ги продолжи набавките на американска соја и други земјоделски производи. САД соопштија дека Кина ќе купи 12 милиони метрички тони соја во тековната сезона и минимум 25 милиони тони годишно во следните три години. Трамп во петокот изјави дека би сакал целосно да ги укине царините поврзани со фентанил доколку Кина продолжи со сузбивање на извозот на дрогата и хемикалиите што се користат за нејзино производство.

„Штом го видиме тоа, ќе ги укинеме и останатите 10 отсто“, изјави Трамп пред новинарите во авионот „Ер Форс Ун“ во петокот.

САД, исто така, во саботата соопштија дека Пекинг ќе преземе чекори за да им овозможи на кинеските погони на холандскиот производител на чипови „Некспирија“ да ги продолжат испораките, потврдувајќи го извештајот на „Блумберг“ од претходниот ден. Овој потег најверојатно ќе ги ублажи грижите за испораките на чипови кои ја загрозуваа автомобилската индустрија поради ескалацијата на трговскиот конфликт меѓу Кина и САД.

Иако договорот ги смири тензиите, пактот може да претставува само краткорочно примирје во подолг трговски конфликт, бидејќи мерките се предвидени да траат само една година. И покрај тоа што се решени некои клучни прашања — и двете страни добија важни отстапки — договорот не ги адресира целосно сите прашања во сржта на трговскиот спор меѓу САД и Кина, и други геополитички жаришта како Тајван и војната на Русија во Украина.

Трамп, исто така, одобри план според кој американски конзорциум ќе ги купи американските операции на апликацијата Тикток, но Пекинг сè уште формално не ја одобрил продажбата. Американскиот претседател изјави и дека ќе има соработка во енергетиката, наведувајќи дека Кина се согласила да купува нафта и гас од Алјаска.