Сенатот со план да ѝ стави крај на владината блокада, демократите согласни

Сенатот на САД направи голем чекор кон повторно отворање на владата, откако група умерени демократи се одвоија од своите партиски лидери и гласаа за поддршка на договорот за ставање крај на рекордно долгата блокада.

Сенатот во неделата вечер со 60 гласа „за“ и 40 „против“ ја одобри процедуралната мерка за унапредување на предлог-законот. Седницата беше одложена до понеделник, а терминот за конечно гласање сè уште не е закажан. Мерката треба да ја одобри и Претставничкиот дом пред да биде испратена на потпис кај претседателот Доналд Трамп.

Според договорот, Конгресот ќе обезбеди целогодишно финансирање за ресорите за земјоделство, ветерници и самиот Конгрес, додека другите федерални агенции ќе бидат финансирани до 30 јануари. Законот предвидува исплата на платите на отпуштените владини службеници, обновување на задржаните федерални плаќања кон државите и општините и враќање на работа на вработените што беа испратени дома за време на блокадата.

Bloomberg

Сè уште не е јасно колку брзо може да заврши владината блокада. Сенатот на САД ќе има потреба од согласност од сите свои членови за да стави брзо крај, бидејќи секој сенатор може да предизвика неколкудневно процедурално одложување.

Претседателот на Претставничкиот дом, Мајк Џонсон, најави рок од 36 часа за враќање на пратениците во Вашингтон.

„Изгледа дека се приближуваме кон крајот на блокадата“, изјави Доналд Трамп пред новинарите во неделата вечер, враќајќи се во Белата куќа.

Фјучерсите на индексот S&P 500 пораснаа за 0,7 отсто, а оние на Nasdaq 100 напредуваа за 1,1 отсто, бидејќи изгледите за постигнување договор го зголемија апетитот за ризик. Азиските берзи исто така забележаа раст, додека обврзниците паднаа по целата крива на приноси, при што приносот на 10-годишните државни обврзници се зголеми за три базични поени, на 4,13 отсто. Јенот, традиционалното засолниште за инвеститорите, ослабе за 0,3 отсто во однос на доларот.

Демократскиот сенатор Тим Кајн од Вирџинија, сојузна држава во која живеат многу федерални работници, го поддржа договорот, нагласувајќи дека законот забранува нови отпуштања во федералната администрација до 30 јануари.

Сепак, усвојувањето на мерката во Претставничкиот дом не е загарантирано. Демократските лидери се изјаснија против секој договор што не вклучува продолжување на субвенциите за Обамакер, што овој закон не го предвидува. Конзервативните републиканци, пак, бараат закон што би ја финансирал целата влада до 30 септември следната година.

Овој компромисен договор, кој има  цел да го зачува политичкиот имиџ на двете страни, е далеку под очекувањата на демократските лидери во двата дома на Конгресот, кои бараа продолжување на субвенциите за премии на Обамакер и укинување на скратувањата на Медикејд што републиканците ги усвоија претходно годинава.

Според анонимен извор, демократите обезбедиле ветување од републиканците дека до средината на декември ќе се гласа за закон за обновување на даночните олеснувања во рамките на Законот за пристапна здравствена заштита (Affordable Care Act).

Тоа ветување, кое лидерот на мнозинството во Сенатот, Џон Тјун, го понудил пред неколку недели, не ги задоволи сите демократи.

„Ќе се бориме против републиканскиот предлог-закон во Претставничкиот дом“, изјави во неделата вечер демократскиот лидер во Претставничкиот дом, Хаким Џефрис.

Bloomberg

Решавањето на 40-дневната блокада на федералната влада потсетува на претходните политички пресметки, кога партијата што се обидувала да ја искористи затвореноста на владата како средство за политички поени, на крајот останувала без победа. Доналд Трамп не успеа да обезбеди средства за изградба на ѕидот на границата во текот на блокадата во 2018–2019 година, а републиканците не успеаја да го укинат Обамакер за време на затворањето на владата во 2013 година.

Оваа година демократите 14 пати гласаа против привремената мерка без услови што Претставничкиот дом ја усвои на 19 септември, со која федералните институции ќе останеа отворени до 21 ноември. Во средата блокадата стана најдолга во историјата на САД, надминувајќи ја 35-дневната криза од 2018 и 2019 година, во првиот мандат на администрацијата на Трамп.

Лидерот на демократското мнозинство во Сенатот на САД, Чак Шумер, се спротивстави на договорот. Во петокот тој изјави дека демократите би дозволиле повторно отворање на владата во замена за едногодишно продолжување на даночните олеснувања поврзани со Обамакер.

Таквата понуда брзо беше одбиена од републиканците, од кои многумина бараат целосна замена на Обамакер со нов републикански здравствен систем, кој сè уште не е претставен.

Републиканците решија да ги блокираат демократските барања за нови 1,5 билион долари буџетски трошоци, држејќи го Претставничкиот дом надвор од работа уште од 19 септември. Белата куќа дополнително го зголеми притисокот со масовни отпуштања на владини службеници, заканувајќи се дека нема да им исплати плати на повеќе од 600.000 отпуштени работници и со обиди да ги игнорира судските налози за исплата на бонови за храна.

Со приближувањето на времето за најмногубројните празнични патувања за Денот на благодарноста, министерот за транспорт Шон Дафи им нареди на авиокомпаниите да ги откажат летовите, предизвикувајќи големи проблеми за патниците. Во неделата тој изјави дека состојбата ќе стане уште потешка во текот на целата празнична сезона.

Bloomberg

Тактиките во голема мера се покажаа успешни во обезбедувањето доволна поддршка од демократските сенатори под притисок. Републиканците, иако ја контролираат работата на двата дома на Конгресот, имаа потреба од осум гласа од демократите за да го прекинат дебатирањето и да ја протуркаат привремената мерка за финансирање во Сенатот на САД.

Разговорите меѓу група сенатори од двете партии се забрзаа по победите на демократите на локалните избори во Њујорк, Њу Џерси, Вирџинија, Калифорнија и други држави. Републиканците изјавија дека демократите изгледале загрижено дека повлекувањето на нивните барања за време на блокадата, пред гласачите да излезат на избори, би можело да го намали одзивот.

Сè уште не е јасно дали Конгресот ќе постигне договор за продолжување на субвенциите за Обамакер пред нивното истекување на крајот од декември. Републиканските лидери во Претставничкиот дом велат дека се против продолжувањето и наместо тоа предлагаат низа конзервативни приоритети, меѓу кои проширување на краткорочните здравствени осигурувања што би конкурирале на плановите преку размената на Обамакер и воведување ограничувања поврзани со абортусот.

Републиканците во Сенатот изјавија дека секое продолжување на субвенциите би морало да вклучува значителни измени, како што се лимити на приходот за примателите и обврска тие да плаќаат барем дел од премијата. Некои, сепак, бараат целосно преработување на Законот за пристапна здравствена заштита пред да прифатат каков било договор.

Последиците од блокадата ја чинат американската економија околу 15 милијарди долари неделно. Конгресната канцеларија за буџет (Congressional Budget Office) проценува дека блокадата ќе ја намали кварталната стапка на раст на реалниот БДП на годишно ниво за 1,5 процентни поени до средината на ноември. Потрошувачкото расположение во петокот падна на најниско ниво во последните три години, поради зголемената вознемиреност околу блокадата, цените и пазарот на трудот.

Блокадата доведе и до суспендирање на поголемиот дел од државните економски податоци, поради што Федералните резерви се принудени да носат одлуки без доволно информации, додека се обидуваат да се справат со упорната инфлација и растечката невработеност.

Годишните буџетски закони вклучуваат и неколку придобивки за демократите, меѓу кои одбивање на барањето од администрацијата на Трамп за кратење на меѓународната хуманитарна помош за храна и зголемување на средствата за безбедност на полициската служба на Капитол со цел заштита на пратениците.

Законот, пак, им носи значајна победа на производителите на пиво, бидејќи ја ограничува продажбата на опојни производи од коноп. Индустријата за коноп тврди дека ваквата одредба го загрозува опстанокот на 325.000 работни места.