Швајцарија е на чекор до постигнување подобар договор со САД за царина од 15 отсто

Швајцарија е блиску до договор за царина од 15 отсто на својот извоз во САД, што претставува големо олеснување за земјата по воведувањето казнена давачка од 39 отсто во август, велат лица запознаени со преговорите.

Според нив, договорот може да биде финализиран во следните две недели, но тие предупредуваат дека ништо сè уште не е договорено и разговорите може да пропаднат, како што се случи при претходните преговори меѓу американските и швајцарските трговски преговарачи доцна во јули.

Американскиот претседател Доналд Трамп потврди дека неговата администрација „работи на договор со кој царините ќе бидат малку пониски“.

„Не сум спомнал конкретна бројка“, додаде тој кога беше прашан за стапката од 15 отсто. „Но ќе работиме на нешто што ќе ѝ помогне на Швајцарија. Ја погодивме многу силно. Сакаме Швајцарија да остане успешна.“

Портпаролот на швајцарската влада одби да коментира, а Канцеларијата на американскиот трговски претставник не одговори веднаш на барањата за коментар.

Претходните преговори завршија со тоа што Швајцарија беше погодена со највисоката царинска стапка што САД ѝ ја воведоа на која било развиена земја. Оттогаш земјата се обидува да обезбеди поповолни услови – напори што добија нов замав минатата недела, кога група швајцарски милијардери и корпоративни директори се сретнаа со Трамп во Овалната соба.

Средбата, според изворите, поминала исклучително добро, по што Трамп му наложил на трговскиот претставник Џејмсон Грир да ги интензивира директните преговори, како што направил и со швајцарските претставници во петокот.

Bloomberg

Постигнувањето на договорот би претставувало успешна кулминација на неколкунеделната дипломатска офанзива во Вашингтон, која ја водеше врвната швајцарска трговска дипломатка Хелен Будлигeр Артиеда, во комбинација со настапот на швајцарските корпоративни кругови за „освојување со шарм“. Царинската стапка од 15 отсто би се изедначила со онаа што важи за соседната Европска Унија и би била огромно подобрување во однос на шокот од 39 отсто што Трамп го објави на 1 август, на Денот на националниот празник на Швајцарија.

Почетната казнена царина беше поврзана со ставот на Трамп дека постои трговски дисбаланс меѓу двете земји, конкретно американски трговски дефицит од речиси 40 милијарди долари. Швајцарија се обидуваше да покаже дека овој дефицит е надоместен со увозот на услуги од САД.

Она што ја направи најавата од 1 август уште потешка беше фактот дека високите швајцарски претставници верувале дека веќе постигнале подобар договор со американските колеги, кој требало само да добие конечна согласност од Трамп.

Швајцарија не може да си дозволи да изгуби премногу време во обиди за намалување на царината, бидејќи веќе се појавуваат знаци на економска штета предизвикана од мерката. Економијата веројатно се намалила во третиот квартал, а централната банка на земјата соопшти дека „перспективите се влошија поради значително повисоките американски царини“. Стапката на невработеност исто така расте, иако со ниско ниво, и моментално е највисока во последните четири години.