Трамп вели дека ќе ја посети Кина – Шји го притиска американскиот лидер за Тајван

Американскиот претседател Доналд Трамп и кинескиот претседател Шји Џјинпинг вчера ги одржаа своите први разговори откако минатиот месец се согласија за царинско примирје. Меѓу темите за кои разговараа беа трговијата, Тајван и руската инвазија на Украина.

Трамп рече дека телефонскиот разговор бил „многу добар“ и дека лидерите разговарале за купување соја и други земјоделски производи, како и за ограничување на испораките на нелегален фентанил. Американскиот претседател рече дека се согласил да го посети Пекинг во април, како и дека го поканил Шји на државна посета следната година.

„Нашите односи со Кина се исклучително силни!“, објави Трамп на социјалните медиуми. „Има значителен напредок од двете страни во одржувањето ажурност и точност на нашите договори. Сега можеме да ги насочиме нашите погледи пошироко, кон целосната слика.“

Но, при реферирањето за телефонскиот разговор, американскиот претседател избегна едно прашање - самоуправниот остров Тајван - што беше централен фокус за Шји. Кинескиот лидер му рекол на Трамп дека враќањето на Тајван на Кина е клучен дел од меѓународниот поредок по Втората светска војна, според соопштението на кинеското Министерство за надворешни работи. Шји исто така рече дека двете земји треба да го задржат позитивниот замав генериран за време на нивниот состанок минатиот месец во Јужна Кореја и да ја прошират соработката, се наведува во соопштението.

Depositphotos

 

Лидерите разговараа и за руската инвазија врз Украина, а Шји изрази надеж дека двете страни ќе постигнат обврзувачки мировен договор, соопшти министерството. Разговорот траел еден час, изјави портпаролката на Белата куќа, Каролин Левит, за новинарите.

„Фокусот беше главно на трговскиот договор на кој работиме со Кина и тие односи, односно како тие се движат во позитивна насока“, рече таа.

Тековниот спор меѓу Јапонија и Кина, во чиј центар е Тајван, се заканува да внесе нови тензии во односот меѓу Трамп и Шји и да ги комплицира врските, откако во октомври двете најголеми економии во светот постигнаа трговско примирје. Јапонија е клучен сојузник на САД во Азија.

Со тој договор Вашингтон ги намали царините поврзани со фентанилот за кинеските стоки, а Пекинг се согласи да отстрани одредени ограничувања за извоз на ретките минерали. Секое влошување на односите меѓу САД и Кина би можело да предизвика дополнителна неизвесност за пазарите и бизнис-секторот.

Новата јапонска премиерка Санае Такаичи претходно изјави дека хипотетички кинески напад врз Тајван би можел да резултира со воен одговор од Токио. Пекинг го смета островот за своја територија и ги осуди забелешките на Такаичи, барајќи повлекување на изјавата.

Оттогаш, Кина издаде предупредување за забрана за патување во Јапонија, го суспендира прикажувањето на некои јапонски филмови и го забрани увозот на јапонски морски плодови. Дополнително, и двете земји ги засилија воените вежби, при што Кина најави патроли во Источнокинеско Море, а Јапонија објави планови за распоредување ракети во област во близината на Тајван.

Depositphotos

 

Во интервју на 2 ноември за емисијата „60 минути“ на Си-би-ес њуз (CBS News) Трамп рече дека Шји „го знае одговорот на тоа“ кога беше прашан дали американските сили би застанале во одбрана на Тајван во случај на кинески напад. Американскиот лидер рече дека темата не била предмет на разговор за време на нивниот состанок минатиот месец.

Трговски услови

САД и Кина сè уште преговараат во врска со клучните детали за тоа како Пекинг ќе ја ослободи продажбата на ретките минерали и метали, велат луѓе запознаени со ова прашање. Двете нации имаат цел да се договорат за условите за „општите лиценци“ што Кина вети дека ќе ги понуди за извоз на ретки земни метали и критични минерали кон САД до крајот на месецот.

И покрај тоа што остануваат во неизвесност тековните разговори за материјалите, кои се клучни за производство на високотехнолошка електроника, САД веќе презедоа чекори кон укинување на царините и мерките за национална безбедност. Недостатоците во резервите на ретки земни метали оставија во опасност од прекини повеќе глобалните индустрии, вклучувајќи ги автомобилската и секторот за производство на стоки за широка потрошувачка и роботика.

Дискусијата доаѓа и во време кога администрацијата на Трамп повторно размислува дали да дозволи продажба на понапредни чипови за вештачка интелигенција на Пекинг. Трамп ја спомена можноста пред неговиот состанок во октомври со Шји, но на крајот двајцата лидери не разговараа за тоа прашање. Некои советници на Трамп предупредија дека потенцијалната продажба ризикува да ја изгуби предноста на САД во новата технологија.

„Претседателот слуша многу различни советници при одлучувањето дали да одобри иден извоз“, изјави вчера министерот за трговија Хауард Лутник во интервју за телевизијата „Блумберг“.

„Таквата одлука е директно на масата на Доналд Трамп“, рече Лутник. „Тој ќе одлучи дали ќе продолжиме со тоа или не.“

Трамп и на 14 ноември изјави дека претставници на САД разговараат со кинеската влада за зголемување на купувањата на американска соја, што е уште една одредба од договорот.