Делси Родригез го ублажи тонот и повикува на соработка со САД по апсењето на Мадуро

Делси Родригез, вршителка на должност претседател на Венецуела, упати повик до САД за соработка со нејзината земја, при што значително го ублажи тонот кон администрацијата на Доналд Трамп, по нејзината почетна осуда на апсењето на претседателот Николас Мадуро.

„Ја покануваме американската влада да работиме заедно на агенда за соработка, насочена кон заеднички развој, во рамките на меѓународното право, и да го зајакнеме трајниот соживот во заедницата“, рече таа во соопштение објавено доцна во неделата.

Ова претставува остар пресврт во однос на изјавите што Родригез ги даде во часовите по акцијата на американските сили во саботата, кога беше уапсен Николас Мадуро и беа изведени прецизни удари во главниот град и во околните градови. Во првичната реакција таа остро ги осуди акциите и побара Мадуро да биде вратен.

По операцијата, претседателот Доналд Трамп изјави дека тим американски функционери ќе „управуваат“ со земјата, а дека Родригез ќе работи заедно со нив.

Во неделата, во изјава за списанието „Атлантик“, Трамп изјави дека Венецуела ќе има потреба од реконструкција и ѝ упати предупредување на Родригез: „Доколку не постапува правилно, ќе плати многу висока цена, веројатно и многу поголема од Мадуро,“ рече тој.

Сепак, државниот секретар Марко Рубио рече дека САД ќе ги следат нејзините постапки повеќе отколку нејзината реторика.

Говорејќи пред новинарите во претседателскиот авион, Трамп повтори дека САД мора да имаат „целосен пристап“ до нафтата за земјата да може да се обнови. „Тој исто така изјави дека оценката на Родригез, дека приведувањето на Мадуро претставува киднапирање, не е погрешен израз.“

Родригез, поранешна министерка за енергетика, е добро запознаена со предизвиците во работењето на државната нафтена компанија „Петролеос де Венецуела“ (Petróleos de Venezuela SA) и со соработката со меѓународните партнери. Но, визијата на Трамп за нагло зголемување на нафтеното производство претставува застрашувачки и скап потфат.

Иако изјавата на Родригез дадена доцна во неделата може да биде знак дека е подготвена на соработка со Трамп, таа истовремено може да ги разгневи „тврдокорните“ во нејзината влада, кои со години на САД гледаат како на империјалистичка закана, а апсењето на Мадуро го оценуваат како кршење на националниот суверенитет.

Родригез веќе во понеделник ќе се соочи со тест за својата политичка моќ, кога новиот состав на пратеници ќе даде заклетва во Националното собрание. Според двајца пратеници, кои побарале да останат анонимни за да избегнат последици, постои неизвесност дали за неа е потребна формална церемонија на инаугурација.

Засега, венецуелските власти статусот на Мадуро го третираат како привремено, принудно отсуство од функцијата, а државните медиуми и натаму го нарекуваат претседател. Мадуро денеска треба да се појави пред суд во Њујорк.