Мамдани вети дека ќе ги искористи сите можности за да ја држи ИЦЕ надвор од Њујорк

Градоначалникот на Њујорк, Зохран Мамдани, изјави дека ќе направи сè што е во негова моќ за да спречи „ужасни“ акции на федералните имиграциски службеници, откако агенти застрелаа и убија американска медицинска сестра во Минеаполис.

Градот има „голем број алатки“ со кои може да го одврати претседателот Доналд Трамп од наредба за агресивна операција на Имиграциската и царинската служба (Immigration and Customs Enforcement), рече Мамдани во емисијата „Оваа недела“ (This Week) на „Еј-би-си“ (ABC).

„И дали тие алатки ќе бидат користење на судовите, јавниот притисок или нашите градски политики, ќе ја исцрпиме секоја можност за да ги заштитиме њујорчаните“, изјави тој.

Градоначалникот ги бранеше политиките на Њујорк како „град-засолниште“, на кои Трамп се спротивставува, а кои им овозможуваат на градовите да ја ограничат соработката со федералните агенции што се обидуваат да депортираат лица без документи.

„Во моментов имате маскирани агенти што ги тероризираат луѓето низ целата земја. Се губи чувството што значи да си Американец во сопствената држава, чувството на безбедност и на припадност“, рече тој. „Тоа е нешто против кое треба да се бориме сите.“

Мамдани и Трамп биле во контакт по нивната средба во ноември во Белата куќа, кога претседателот изјавил дека сака градоначалникот да успее.

Мамдани рече дека Трамп му го дал својот број на мобилен телефон и дека нивните разговори биле насочени кон тоа „да испорача за њујорчаните“, но одби да навлегува во детали.