Прв напад врз танкер во близина на Ормускиот Теснец од почетокот на војната

Оман соопшти дека мал нафтен танкер бил цел на напад крај неговиот брег во Арапското Море, што претставува прв сигнал за напад врз бродови во близина на Ормускиот Теснец откако на Блискиот Исток почна војната.

Оманската служба за поморска безбедност наведе на платформата Икс дека напаѓачите го таргетирале танкерот „Скајлајт“ (Skylight) северно од пристаништето Хасаб. Евакуирани се 20 членови на екипажот, а четири лица се повредени.

Тензиите во регионот веќе се прелеваат и на пазарот на нафта. Додека Иран им се заканува на бродовите во близина на Ормускиот Теснец, а дел од танкерите остануваат заглавени во Персискиот Залив, трговците и рафинериите бараат алтернативни извори на снабдување.

 

Иран и Русија во моментов имаат големи количини сурова нафта складирани на море. Во азиските води се наоѓаат околу 48 милиони барели иранска нафта, главно во Жолтото Море и околу Сингапурскиот Теснец, како и околу 9,5 милиони барели руска сурова нафта.

Тие резерви можат да ублажат дел од шокот од Блискиот Исток. Најмногу би можела да профитира Кина, како најголем купувач на такви видови нафта, додека значајните попусти и големите руски количини би можеле да привлечат и индиски купувачи.