Дубаи го затвора најголемото пристаниште на Блискиот Исток, запрен товарниот сообраќај

„ДП Ворлд“ (DP World) го суспендираше работењето во пристаништето Џебел Али во Дубаи, додека „МСЦ“ (MSC) соопшти дека ги запира новите резервации на товар за Блискиот Исток до стабилизирање на безбедносната состојба.

Управата на пристаништето привремено ги затвори сите терминали како мерка на претпазливост, се наведува во известување испратено до клиентите во коешто увид имал „Блумберг“.

Џебел Али е најголемото контејнерско пристаниште на Блискиот Исток и едно од клучните средишта на трговијата во Дубаи.

Во еден од пристанишните терминали избувнал пожар откако паднале остатоци од ракети при пресретнување на  проектилите во воздух, објави Канцеларијата за медиуми на Дубаи на платформата Икс.

Екипите на цивилната заштита интервенирале за да го изгаснат пожарот, се наведува во објавата од неделата наутро.

„МСЦ“ на својата интернет-страница соопшти дека внимателно го следи развојот на ситуацијата и соработува со надлежните институции за да ја осигура безбедноста на работењето.

Резервациите за Блискиот Исток повторно ќе бидат отворени штом безбедносните услови се стабилизираат, наведуваат од компанијата.