Примирје е можно само ако САД и Израел ветат дека нема да напаѓаат

Иран им порачал на регионалните посредници дека за примирје САД мора да гарантираат дека ниту тие ниту Израел во иднина нема да ја нападнат земјата, велат неколку официјални лица запознаени со прашањето.

Иран е особено загрижен дека Израел повторно би можел да нападне по завршувањето на сегашната војна, изјавија изворите, кои побарале да останат анонимни бидејќи станува збор за чувствителни разговори.

Не е јасно дали САД се подготвени да му дадат такво ветување на Иран и дали би можеле да инсистираат Израел да го стори истото тоа.

Заткулисните контакти се олеснуваат преку европски и блискоисточни земји, изјавија изворите.

Доцна во средата, иранскиот претседател Масуд Пезешкијан изјави дека единствениот начин да ѝ се стави крај на војната е „признавање на легитимните права на Иран, исплата на репарации и цврсти меѓународни гаранции против идни напади“. Тој рече дека таа порака им ја пренел на „лидерите на Русија и Пакистан“.

Запрашан за коментар, висок претставник на Белата куќа изјави дека кампањата против Иран продолжува непрекинато. Тој се повика на изјавата на претседателот Доналд Трамп дека потенцијалните нови лидери на Иран сигнализирале оти сакаат разговори и дека на крајот ќе разговараат.

Војната меѓу САД и Израел од една страна и Иран од друга, која започна на 28 февруари, покажува малку знаци за скоро деескалирање. Трамп неделава изјави дека таа би можела наскоро да заврши бидејќи иранската војска е значително ослабена. Но јавно, сите три земји велат дека се подготвени да продолжат со борбите најмалку уште неколку недели.

Иран продолжува да испалува ракети и беспилотни летала кон Израел и кон земјите од Персискиот Залив, како Саудиска Арабија, Обединетите Арапски Емирати, Катар и Бахреин. Неговите напади врз бродови практично го затворија Ормускиот Теснец, низ кој минува една петтина од светската нафта и природен гас, предизвикувајќи хаос на енергетските пазари.

Саудиска Арабија минатата недела го засили директниот ангажман со Иран во обид да го ограничи конфликтот, објави „Блумберг“. И други земји од Заливот чии економии и финансиски пазари трпат удари поради војната исто така се обидуваат да разговараат и со Иран и со САД, изјавија официјалните лица.

Масуд Пезешкијан во 2025 година/Фотограф: Дејвид Ди Делгадо/Bloomberg

Султанот на Оман, Хајтам бин Тарик, во средата разговарал со иранскиот претседател Масуд Пезешкијан, што е прв таков разговор меѓу двајцата откако избувна конфликтот. Султанот ги осудил нападите на Иран врз Оман, пренесоа оманските државни медиуми, кои објавија малку други детали. Разговорот се случил откако беспилотни летала погодиле резервоари за гориво во пристаништето Салалах во јужен Оман.

САД и Израел испратија мешани сигнали за целите на војната. Првично и двете земји навестуваа дека сакаат смена на режимот. Но и покрај тоа што врховниот лидер ајатолахот Али Хаменеи беше убиен во првите напади, Иран остана цврст и покажа воена издржливост. Пркосот го демонстрираше со изборот на неговиот тврдолиниски син Моџтаба за нов врховен лидер.

Израелската и американската влада оттогаш навестија дека би прифатиле и помали цели од уривање на Исламската Република. Тие вклучуваат уништување на иранската ракетна програма и на морнарицата.