.webp){kind=icon}
Наместо да прави колачиња или да се дружи на „Зум“ (Zoom) во екот на пандемијата, Тејт Беренбаум поголемиот дел од времето го минувал во кодирање во својот подрум. Таму, средношколецот изработил развојна алатка за Arweave, платформа слична на блокчејн позната по трајното складирање на податоци. Во тоа време не ни претпоставувал дека сработеното ќе му го промени животот.
Тој сега има 19 години и собра 30 милиони долари за Community Labs, софтверски стартап и venture studio посветен за поддршка на крипто проектите на Arweave. Беренбаум во едно интервју рече дека се преселил во Њујорк и ја ставил во мирување првата година од студиите на Универзитетот во Вирџинија, додека ја гради компанијата.
„Во моментот, не планирам да се вратам на колеџ“, вели Беренбаум.
Lightspeed Venture Partners го предводеше кругот на финансирање на Community Labs, во кој беа вклучени и Arweave, Bain Capital Crypto и Blockchain Capital, меѓу другите инвеститори. Беренбаум одби да ја открие вредноста на стартапот.
Тејт Беренбаум / Bloomberg
Основана оваа година, Community Labs сега има осум вработени ширум светот, вклучувајќи го и 38-годишниот ко-основач и советник на Беренбаум, Лео Луцисан. Беренбаум вели дека тимот е посветен да донесе разновидност во Arweave.
Arweave е платформа која е чест избор за децентрализирано складирање на податоци. На пример, Arweave се користи за архивирање на дигитални записи од војната во Украина, како што се твитови и видеа кои го документираат конфликтот.
Но, освен проширувањето на можностите за складирање на податоци, Беренбаум бара и други намени за Arweave што ќе му овозможат да функционира слично како блокчејновите како Ethereum и Solana.
„Може да се користи за финансиски цели“, рече Беренбаум, истакнувајќи дека тој веќе изградил услуга наречена Verto, децентрализирана размена за тргување со токени на Arweave. Тој вели дека Community Labs е исто така заинтересиран за подобрување на апликациите наменети за клиентите, како што е складирање на податоци за незаменливите токени (NFT).
Arweave засега е во добра позиција биде „важен дел“ од web3 инфраструктурата, според Вил Леас, консултант во Lightspeed и деловен партнер во Lightspeed Faction, кој е фокусиран на стартапи поврзани со блокчејн. Тој вели дека компанијата одлучила да го поддржи стартапот на Беренбаум делумно затоа што тинејџерот е идејниот творец и еден вид лидер во заедницата Arweave.
Семјуел Харисон, постар советник во Lightspeed и основач и управен партнер во Lightspeed Faction, во интервју истакна дека неговиот тим сè уште е заинтересиран за поддршка на проекти како Community Labs и покрај почетокот на крипто зимата.
„Ние навистина не се обидуваме да ја засилиме или намалиме нашата инвестициска активност врз основа на циклусот“, посочи Харисон.
