Договор со Твитер би отворил пат за идејата на Маск 'Х, апликација за сè'

Илон Маск понуди да го купи „Твитер“ (Twitter Inc.) по првичната цена од 54,20 долари по акција, што би му помогнало да избегне судска вмешаност во една од најтешките аквизиции во поновата историја.

Маск претходно зборуваше дека купувањето на Twitter ќе го забрза создавањето на она што тој го нарекува „Х, апликација за сè“, сугерирајќи дека сака да додаде нови услуги на социјалната мрежа.

Во своите први изјави по обновувањето на обидот да го купи Twitter за околу 44 милијарди долари, Маск ја нарече аквизицијата „забрзување“ во изградбата на некој вид на повеќенаменска апликација.

Маск досега веќе размислуваше гласно за тоа како да го направи Twitter покорисен, нагласувајќи дека сака да биде повеќе како „Вичет“ (WeChat), услугата за пораки која е многу популарна во Кина и „Тик-ток“ (TikTok), услугата за споделување видеа во кинеска сопственост, која е апсолутен хит во САД. Тој повлече паралели со т.н. „суперапликации“ кои се вообичаени во делови од Азија, а кои им овозможуваат на луѓето да користат една апликација за паметен телефон со широк опсег на услуги, од пораки и други комуникации до нарачување храна и повикување на превоз.

На годишното собрание на акционери на „Тесла“ (Tesla), во август, Маск истакна дека многу го користи Twitter и има идеи како платформата да ја направи „радикално подобра“. Тој ги спореди своите амбиции за Twitter со визијата што ја имал за X, фирма за финансиски услуги во која бил соосновач во 1999 година.

Bloomberg

„Имам поголема визија за она што мислев дека X.com или X Corporation би можеле да бидат некогаш“, рече Маск. „Тоа е прилично голема визија и очигледно може да се започне одново, но мислам дека Twitter би помогнал да се забрза тоа за три до пет години“, истакна во таа прилика Маск, додавајќи дека тоа е нешто што ќе биде многу корисно за светот.

Потенцијалната аквизиција одново привлече внимание во вторникот, откако Маск му кажал на управниот одбор на Twitter дека е подготвен да го испочитува договорот и да плати 54,20 долари по акција. Претходно, Маск се обиде да излезе од договорот, првично потпишан во април, тврдејќи дека Twitter го довел во заблуда за бројот на автоматизирани налози на платформата, познати како ботови. Правна битка која има за цел да го принуди Маск да ја заврши трансакцијата се води во судот во Делавер.

Twitter потврди дека ја добил кореспонденцијата на Маск и соопшти дека има намера да ја заврши понудата по договорената цена од 54,20 долари по акција. Плановите допрва треба да се разработат.

Во моментов нема коментари за веста. Биди прв да коментира...

Остави коментар