.webp){kind=icon}
Ерик Шмит повикува на реформирање на индустриската политика на Вашингтон за борба во рамки на засиленото технолошко ривалство меѓу САД и Кина.
Филантропската група на поранешниот главен извршен директор на „Гугл“ (Google) издаде препораки со цел да се охрабрат американските политичари да се спротивстават на зголемените технолошки амбиции на Кина преку засилување на регулаторната контрола, охрабрување на повеќе приватни инвестиции и нудење даночни кредити за обука на работниците.
Шмит (67) поднесе оставка во 2011 година од позицијата извршен директор на Google - сега познат како „Алфабет“ (Alphabet Inc.) - но останува трет по големина индивидуален акционер на компанијата по основачите Лери Пејџ и Сергеј Брин. Неговиот удел го сочинува најголемиот дел од неговото богатство од 18,9 милијарди долари, според индексот на милијардери на Bloomberg, но тој исто така инвестира или има лидерски улоги во фирми за вештачка интелигенција и квантни компјутери.
Ерик Шмит / Bloomberg
Кина ги изненади САД во „борбата“ за клучните технологии - вклучувајќи безжична 5G мрежа, микроелектроника и вештачка интелигенција - бидејќи индустриската политика на азиската држава ѝ овозможи да доминира на пазарите за беспилотни летала, батерии со висок капацитет, критични минерали, соларни панели, турбини и бродоградба, се вели во извештајот на Special Competitive Studies Project, поддржан од Шмит.
„САД имаат огромни економски предности, но постојат предупредувања кои се алармантни“, вели Лиза Тобин, виша директорка на проектот и поранешна директорка за Кина во Советот за национална безбедност на САД. „На САД им е потребна индустриска стратегија во американски стил, која ја поттикнува конкуренцијата во нашиот динамичен приватен сектор и внимателно ги насочува стимулациите во секторите каде што треба да водиме“, додава таа.
Извештајот ја повикува американската Влада да го зајакне микроелектронското производство со помош на голем фонд за отклучување на приватниот капитал, да создаде безбедносен центар со отворен код за да им помогне на инвестициите во дигиталната инфраструктура, да формира комисија за национална безбедност за дигитални финансии и да им даде поголема моќ на регулаторите да ги проверуваат инвестициските текови во Кина кои би можеле да ја загрозат националната безбедност на САД.
Шмит го создаде проектот минатата година и го именуваше Јили Бајрактари за извршен директор. Бајрактари е поранешен шеф на кабинетот на советникот за национална безбедност Х.Р. Мекмастер и соработувал со Шмит во Националната безбедносна комисија за вештачка интелигенција.
Длабока технологија
Проектот црпи инспирација од иницијатива од времето на Студената војна на Нелсон Рокфелер, која дошла како одговор на лансирањето на „Спутник“ од страна на Советскиот Сојуз. Шмит му се придружи на колегата технолошки милијардер, Питер Тиел, во поддршката на друга непрофитна организација наречена America's Frontier Fund, која има за цел да собере милијарда долари ризичен капитал за да ги таргетира таканаречените индустрии за длабока технологија (deep tech) - оние кои не се нужно фокусирани на услуги за крајните корисници - а кои може да не се забележливи за Волстрит.
„Бевме пријатно изненадени од реакциите од Силиконската долина“, рече Тобин. „Забележавме промена каде што многу инвеститори, капиталисти со ризични средства, технолози итн. се желни да се вклучат во овој американски проект, заинтересирани за националната безбедност. Волстрит е малку зад Силиконската долина, но гледаме дека се случува пресвртот“, нагласи таа.
Извештајот на SCSP од 75 страници ја повикува Владата да создаде независна развојна банка за да обезбеди капитал за да се ублажи ризикот за приватните инвестиции во длабока технологија и да го промени ограничувањето за визите H-1B за да помогне во надминувањето на јазот за околу 90.000 талентирани работници во индустријата за микроелектроника.
Гилман Луи, извршен директор и ко-основач на America's Frontier Fund, вели дека технолошкиот напредок на Пекинг во рамки на стратегијата „Made in China 2025“, со нејзините временски рокови и јасни стандарди, само го прават поочигледен фактот дека „Америка нема бизнис план“.
„Критично е да се спојат силите на Владата, академијата, истражувањето и пазарот“, рече Луи во едно неодамнешно интервју. „Без пазарот, не можете да ги земете овие технологии и да ги вклучите во економијата на начин кој би бил продуктивен”, посочува тој.
