Се тркаме со „Опен еј-ај“, а трета страна ни го јаде ручекот, вели инженер од „Гугл“

Виш софтверски инженер во „Гугл“ (Google) напиша критика во која тврди дека лидерот во интернет-пребарувањето ја губи предноста во областа на вештачката интелигенција (ВИ) во однос на заедницата со отворен код, каде што многу независни истражувачи користат технологија за ВИ за да постигнат брз и неочекуван напредок.

На почетокот на април инженерот Лук Сернау објави документ за интерниот систем на „Гугл“. Во текот на изминатите неколку недели, документот бил споделен илјадници пати меѓу вработените во компанијата, според лице запознаено со ова прашање, кое побара да остане анонимно бидејќи нема ингеренции да разговара за внатрешни работи на компанијата. Документот бил публикуван во четвртокот од страна на консултантската фирма „Семи анализис“ (SemiAnalysis) и ја обиколил Силициумската Долина.

Во анализата на Сернау, ривалството на „Гугл“ со стартапот „Опен еј-ај“ го одвлекува вниманието на компанијата од брзиот развој на технологијата со отворен код. „Многу го разгледувавме 'Опен еј-ај'. Кој ќе го направи следниот одлучувачки чекор? Кој ќе биде следниот потег?“, напиша тој. „Но, непријатната вистина е дека ние не сме во позиција да победиме во оваа трка за вооружување, а не е ниту 'Опен еј-ај'. Додека се препиравме, третата страна тивко ни го јадеше ручекот. Зборувам, се разбира, за отворениот код“.

Сернау не одговори на барањето за коментар.

Како што се забрзува напредокот во генеративната вештачка интелигенција, вработените во „Гугл“ и другите технолошки гиганти се вклучија во жестоки внатрешни и надворешни дискусии за технологијата што ги преобликува нивните индустрии. „Гугл“ особено се најде под притисок бидејќи широката популарност на четботот на „Опен еј-ај“, ЧетГПТ, предизвика загриженост дека компанијата можеби ја губи предноста во сферата на вештачката интелигенција, област во која долго време е лидер.

Сепак, Сернау тврди дека вистинската закана за „Гугл“ доаѓа од заедниците со отворен код, каде што инженерите брзо усовршуваат модели што по квалитет им парираат на оние на големите технолошки компании и можат да бидат поевтини. Овие модели, нагласува тој, можат да бидат побрзи, поприспособливи и покорисни од оние на „Гугл“.

„Немаме тајна состојка“, пишува Сернау. „Нашата најголема надеж е да научиме и да соработуваме со она што другите го прават надвор од 'Гугл'“. Тој изрази загриженост дека клиентите нема да бидат подготвени да платат за модели со толку висока технологија кога има такви што се бесплатни.

Портпаролот на „Гугл“ не ја коментираше содржината на објавата. Во неодамнешниот повик, извршниот директор на „Алфабет“, Сундар Пичаи, рече: „Нашите инвестиции и откритија во вештачката интелигенција во последната деценија нè позиционираа добро“, укажувајќи на напредокот во развојот на модели и работата со програмери и други партнери. Пичаи во минатото повика на регулирање на вештачката интелигенција, предупредувајќи дека технологијата може да биде „многу штетна“ доколку не се применува разумно.

Во февруари во јавноста протече голем јазичен модел создаден од „Мета“, забрзувајќи го напредокот во генеративната вештачка интелигенција на форумите со отворен код. Моделот, познат како ЛЛАМА (LLaMA), е помал од моделите што ги промовираат „Гугл“ и „Опен еј-ај“, што ја олеснува работата со него; истражувачите во моментов треба да се логираат на „Мета“ за да пристапат до ЛЛАМА.

„’Гугл’ би направил добро ако се фокусира на помали, поагилни модели“, тврди Сернау. „Џиновските модели нè забавуваат“, пишува инженерот. „На долг рок, најдобри модели се оние што можат брзо да се повторат“.

Во моментов нема коментари за веста. Биди прв да коментира...

Остави коментар