.webp){kind=icon}
Прославата за пензионирање на Кори Пренат не се одвивала според планираното. Наместо да ужива во играњето голф со своите пријатели на сите познати терени на отворено низ Обединетото Кралство, 47-годишникот на крајот завршил патувајќи по целата земја, обидувајќи се да ги пронајде своите торби откако тие се изгубиле на патувањето од САД.
Пренат, од Тампа Беј, Флорида, прикачил уреди од „Епл“ (Apple) наречени AirTags на неговата торба за голф и другиот багаж за да следи каде се тие откако се пријавил за неговиот лет. По слетувањето во ОК, видел дека неговите торби уште се заглавени на аеродромот во Њуарк, каде што останале два дена. Неговиот багаж на крајот бил испратен во магацин во Единбург, но додека возел таму за да го земе, забележал дека неговите палки веќе се упатени кон Абердин. Системот за следење на крајот покажал дека тие конечно завршиле во Вест Мидлендс во Англија.
„Тоа е хаос“, рече тој.
Искуството на Пренат го опфаќа хаосот со кој се соочуваат патниците додека аеродромите во Европа, САД и на други места се преплавени од порастот на патничкиот сообраќај и багажот затоа што немаат доволно персонал за да се справат по масовните отпуштања што ја зафатија воздухопловната индустрија за време на пандемијата.
Патниците сè повеќе се потпираат на AirTags и слични уреди од други компании за да ги следат нивните работи. „Епл“ ги претстави AirTags во април 2021 година со почетна цена од 29 долари, додека SmarTag на „Самсунг“ (Samsung Electronics Co.) чини 29,99 долари.
Уредите, кои користат блутут на кратко растојание, се дозволени во авиони, при што многу патници веќе летаат со гаџети кои користат слична технологија како конзоли за игри и слушалки.
Патничка од „Бритиш ервејс“ (British Airways Plc) на „Твитер“ оваа недела напиша дека трагачот покажал оти нејзиниот багаж пристигнал на аеродромот „Хитроу“ во Лондон еден ден по нејзиниот лет и е таму повеќе од 10 дена. Минатиот месец, патник на „Сингапур ерлајнс“ (Singapore Airlines Ltd.) го користел својот AirTag за да ги лоцира и да ги собере своите торби откако биле заглавени на аеродромот во Мелбурн една недела, објави „Дејли Меjл“ (Daily Mail).
„Хитроу“, еден од најпрометните аеродроми во светот, во вторникот воведе двомесечно ограничување на дневниот патнички сообраќај, до 11 септември, поради недостиг на персонал, барајќи од авиокомпаниите да се воздржат од продажба на билети. Оваа недела, „Делта ер лајнс“ (Delta Air Lines Inc.) крена празен авион за да донесе 1.000 изгубени торби од аеродромот назад во САД. „Делта ер лајнс“ не одговори веднаш на барањето за коментар.
Два месеца од неговото патување и по повеќекратните прашања до „Бритиш ервејс“ и курирски компании, Пренат сè уште ја нема вратено својата торба за голф. Тој вели дека содржела опрема вредна повеќе од 10.000 долари, вклучително и палка од 4.000 долари што неговиот син му ја дал како подарок за пензионирање.
На крајот тој изнајмил неколку палки за голф.
