.webp){kind=icon}
Холандското регулаторно тело за заштита на приватноста побара појаснување од производителот на ЧетГПТ (ChatGPT), „Опен еј-ај“ (OpenAI), за тоа како постапува со личните податоци додека го обучува својот базичен систем во услови на зголемена контрола на четботот што генерира вештачка интелигенција.
Во писмото до „Опен еј-ај“, која е поддржана од „Мајкрософт“ (Microsoft Corp.), регулаторот праша дали прашањата внесени во ЧетГПТ се користат за обука на неговиот алгоритам. Исто така регулаторното тело се распрашуваше и за начинот на кој организацијата собира и користи лични податоци од интернет, се наведува во соопштението испратено денеска преку електронска пошта.
„Тие податоци може да содржат чувствителни и многу лични информации, на пример ако некој побара совет за брачна расправија или за медицински прашања“, се наведува во соопштението.
Потегот на холандскиот орган за заштита на податоците доаѓа во време на зголемени повици за надзор на четботот. Европскиот одбор за заштита на податоци во април формира работна група фокусирана на ЧетГПТ, преку која земјите-членки можат да разменуваат информации за можните мерки за преземање од страна на регулаторите.
Агенцијата соопшти дека околу 1,5 милион луѓе во Холандија користеле ЧетГПТ во првите четири месеци од неговото лансирање.
