.webp){kind=icon}
Австриската полиција бара од македонското МВР да провери дали Беран Алији, австрискиот тинејџер со потекло од Македонија кој планираше голем терористички напад во Виена, доаѓал во земјава и дали домашните безбедносни служби имаат сознанија за него. Деветнаесетгодишникот признал дека нападите било планирано да бидат извршени со експлозив и со ладно оружје за време на концертите на американската ѕвезда Тејлор Свифт.
Добро утро, ова се останатите пет вести важни за почеток на денот.
Македонски бренд ќе го освојува светот со мода од иднината
Иновативна облека наменета за лицата со попреченост наскоро ќе почне да се произведува во Македонија. Станува збор за дизајнирани парчиња што на овие граѓани треба значително да им го олеснат процесот на облекување. Брендот ZEN* е најавен како одржлива и функционална „мода од иднината“, а сопственикот Гере Трипков, и самиот лице со хендикеп, најавува сериозен бизнис-модел со кој планира да го освои глобалниот пазар.
„Лицата со попреченост како општествена заедница што сочинува 15-20 проценти од светската популација се справуваат со секојдневни предизвици и проблеми, а еден од нив е немањето пристапност на пазарот на гардероба до облека што одговара на нивните конкретни потреби“, вели Трипков, кој е магистер по меѓународни односи.
Кои македонски олимпијци досега имаат освоено медали?
Како што се приближува крајот на Летните олимписки игри во Париз, така спортистите од целиот свет размислуваат за врвни достигнувања по годините непоштедно тренирање, посветеност и пожртвуваност. Последните денови од Игрите се обележани со интензивна конкуренција, бидејќи учесниците се борат за врвниот симбол на атлетската извонредност: олимписки медал. Ова достигнување е повеќе од само трка со часовникот или натпревар со конкурентите; тоа е патување што ја отелотворува самата суштина на олимпискиот дух.
За многу спортисти освојувањето медал е врв во нивната кариера, награда за безбројните часови поминати во усовршување на своите вештини, надминување на повредите и поместување на нивните физички и ментални граници. Олимпискиот медал означува личен триумф, национална гордост и универзална желба за постојано подобрување на човечките достигнувања. Тоа е момент што може да го трансформира спортистот во национален херој, да ги инспирира идните генерации да ги остварат сопствените соништа и да ги обедини луѓето во заедничка прослава.
Поскапува студирањето за Македонците во Германија
Од почетокот на новата академска година во септември, Германија го поскапува студирањето за Македонците и другите студенти кои не се од земјите на Европската Унија.
Услов за добивање виза за студентите кои доаѓаат од земјите кои не се во ЕУ е да докажат дека имаат доволно пари за да се издржуваат за време на студирањето. Овој доказ сега се зголемува за околу 700 евра годишно.
Турција го блокираше пристапот до „Роблокс“
Турција го блокираше пристапот до детската платформа за игри „Роблокс“ поради содржината за која висок функционер во земјата изјави дека може да доведе до злоупотреба на деца.
Правната одлука се заснова на законот кој го регулира интернет емитувањето, рече министерот за правда Јилмаз Тунч во изјава за платформата Х.
Годинашниов јули е втор најтопол јули во историјата на мерењата
Минатиот месец бил втор најтопол јули досега, со што заврши 13-месечната серија во која секој месец беше најтопол, што делумно беше предизвикано од глобалното затоплување поради климатскиот феномен Ел Нињо, објави вчера европската служба за климатски промени „Коперник“.
Според месечниот извештај, јули бил 1,48 Целзиусов степен над прединдустриските нивоа од 1850 до 1990 година, додека изминатите 12 месеци биле 1,64 степен над прединдустрискиот просек поради климатските промени.
