Изборни резултати: ВМРО-ДПМНЕ ќе формира нова влада

Според првичните неофицијални резултати од денешните парламентарни избори односно обработени податоци од 95,20 проценти од избирачките места, ВМРО-ДПМНЕ е убедлив победник со освоени 59 пратенички мандати.

Претседателот на ВМРО-ДПМНЕ, Христијан Мицкоски, на прес-конференција вечерва рече дека веќе разговара со Арбен Таравари, Изет Меџити и со Биљал Касами и очекува брзо да се формира влада со коалицијата Вреди. Притоа, како што рече, ќе разговара и со другите партии.

„Падна владата во Македонија и има причина за тоа - криминалот, корупцијата, неспособноста, лажните вредности, одземената држава, тендерите, непотизмот… работи со кои направија државата да страда, а народот да е разочаран. Вечерва конечно се поразени. Поразени се и предавствата, поделбите. И тие стотина луѓе од ДУИ и СДСМ што мислеа дека се господари на нашите животи ги боли главата, и има зошто. Ќе одговараат до последниот. Секој што направил криминал и спровел корупција. Мора да има одговорност што ќе се темели на правда и закон“, изјави Мицкоски.

Лична архива

Тој додаде дека двојната победа е уште послатка за ВМРО-ДПМНЕ бидејќи поразен е обидот за бојкот на ДУИ.

„Народот покажа дека нема да дозволи поединци да создаваат кризи и преку институции да се штитат себеси. А ДУИ покажа дека е најмалку партија што се грижи за Македонија и стана силно криминализирана структура. Но, сè им се удри од глава и на крајот се избојкотираа самите себеси. Време е да одат заедно со СДСМ во опозиција. Народот одржа лекција и си ја спаси државата“, рече Мицкоски.

Тој уште потенцира дека денешните резултати покажале оти Македонија не ѝ припаѓа на ниту една партија.

„Честа е голема, одговорноста уште поголема, нема да ве разочараме. Планирам резултатите да се почувствуваат веднаш. Во напредна фаза сме за силен инвестициски пакет, кој ќе ја зајакне економијата. Уште во првите сто дена очекувајте добра вест за народот и македонската економија. Заедно и обединето треба да направиме повеќе за сопствената и иднината на нашите деца“, рече Мицкоски.

Тој им порача на идните функционери никогаш да не го забораваат народот.

„Овој народ испиша историја. Со истрајност и верба ги победи криминалот и корупцијата. Овој народ си ја врати повторно Македонија. Народот покажа дека ничија свеќа не гори до зори. Оставете бел образ, бидете одговорни и чесни. Ќе се соочите со овој народ повторно, немојте ни на крајот на паметот да ви текне да го потцените овој народ. Нема еуфорија, ароганција. Нема да биде лесно, има многу предизвици. Доста е со деновите кога една влада им служеше само на поединци“, порача Мицкоски.

Коалицијата Вреди излезе како победник во сите општини со мнозинско албанско население. Од утре почнуваат преговорите за нова влада помеѓу ВМРО-ДПМНЕ и коалицијата Вреди. „Честитки на сите Албанци, честитки за сите граѓани“, изјави Биљал Касами од Беса.

„Коалицијата Вреди е апсолутен победник кај Албанците. Ова е како резултат на доаѓањето на нашите иселеници. Затоа сто илјади пати им велам благодарам, благодарам, благодарам на сите што дојдоа и уште еднаш ја направија разликата во татковината. Затоа во име на сто илјади гласа на коалицијата Вреди им кажуваме благодарам“, изјави Касами.

СДСМ го призна поразот

Денешниот резултат е разочарувачки, на СДСМ му е зададен сериозен удар, оцени претседателот на СДСМ Димитар Ковачевски на прес-конференцијата во седиштето на партијата за изборните резултати од двојните избори и најави процес на обнова и консолидација на партијата и нови избори за претседател и раководство на партијата.

Тој ги оцени изборите како фер и слободни, организирани во согласност со европските стандарди и рече дека тоа е огромен исчекор како резултат на слободата на медиумите и мирот и стабилноста што ги воспоставија во изминатите години. Ковачевски упати честитки за победата на политичкиот конкурент ВМРО-ДПМНЕ и на нивниот претседател Христијан Мицкоски, како и на Гордана Силјановска-Давкова за изборот за претседател, посакувајќи ѝ да ја врши функцијата во согласност со уставните овластувања и евроатлантската посветеност. Тој упати честитка и до граѓаните и членството на СДСМ, кои и покрај резултатите од првиот круг, достоинствено излегоа да гласаат и помогнаа да се постигне цензусот за избор на претседател.

Лична архива

„СДСМ повторно покажа државотворност и одговорност по стоти пат. Најлесно беше по толку лажни обвинувања и напади од ВМРО-ДПМНЕ да не го мобилизираме нашето членство за гласање на претседателските избори, но не паднавме во таа замка. Покажавме дека Македонија ни е поважна и секогаш ќе биде така. Денешниот резултат е разочарувачки. На СДСМ му е зададен тежок удар не само од граѓаните туку и од симпатизерите и поддржувачите на партијата. Во наредниот период детално ќе ги анализираме овие резултати. Во наредните месеци ќе треба посериозно и подлабоко да ги најдеме изворот и причините за овој поразителен исход“, рече Ковачевски.

Тој посочи дека не сака да избрзува со заклучоци и да посочува виновници, но подвлече дека и тој и партиското раководство, како и сите избрани функционери, имаат одговорност на локално и централно ниво.

„Никој реално не е без одговорност и тука ќе мора заедно да поминеме низ овој процес. СДСМ ќе треба добро да погледне навнатре, да размисли што направивме и кои се резултатите и да види кои се слабостите во изминатите четири години, а можеби и во последните седум години. И уште поважно, што е тоа што треба да направиме за ја обновиме и вратиме довербата на граѓаните што ја изгубивме“, рече Ковачевски.

Тој најави процес на обнова и консолидација на партијата и повика на нов избор на сите партиски тела, почнувајќи од претседателот на партијата, раководството и сите органи на партијата.

„Не се сомневам дека многу граѓани вечерва чувствуваат страв, страв од прекумерната моќ што ја има партијата што е позната по злоупотреба на моќта. СДСМ и коалицијата мора и треба да бидат силна, одговорна и државничка опозиција“, порача Ковачевски.

Тој напомена дека за него во изминатиот двегодишен период најважно било тоа што во услови на криза се обиделе никого да не оставам сам, се грижеле за сите, и за младите и за пензионерите, и за работниците и за земјоделците, и постигнале највисоки плати досега и највисока вработеност во државата.

„За тоа не барам благодарност, затоа што кризите никогаш не ги користев како оправдување и бегство од проблемите. Напротив, работев како што знаев и умеев, искрено, чесно и посветено, да им се помогне на државата и на граѓаните. И знам дека постигнавме многу и дека за дел времето ќе потврди дека сме биле во право“, рече Ковачевски.

Тој додаде дека следната година е можност земјава да ја продолжи евроинтеграцијата и нагласи дека ако се пропушти таа шанса, може да се загуби уште една деценија, но можеби и уште една генерација.

„СДСМ ќе се однесува одговорно, но топката сега е во рацете на новата влада, предводена од Христијан Мицкоски“, порача Ковачевски, предупредувајќи на последиците од евентуалните обиди за блокирање на патот кон Европа и потенцирајќи дека местото на Македонија е во НАТО и во ЕУ.

Претседателот на ДУИ, Али Ахмети, вечерва од седиштето на партијата во Мала Речица рече дека коалицијата Европски фронт е втора сила во државата по денешните избори.

„Легитимитетот ни го дадоа граѓаните, мнозинството Албанци и малите заедници, како Турците, Бошњаците и Ромите, на кои им се заблагодарувам. Ова е првиот чекор кон долгите етапи на Фронтот за Европа до полноправно членство во ЕУ“, рече Ахмети.

Лична архива

Според Ахмети, денес, повеќе од кога било, на државата ѝ се потребни стабилност, мир, нула проблеми со соседите, владеење на правото, почеток на преговорите и отворање на меѓувладините состаноци за официјален почеток на членството во ЕУ.

„Остануваме силен фронт на мисионерите до реализација на финалните цели за членство во ЕУ“, рече Ахмети.

„Движењето ЗНАМ - За наша Македонија вечерва испиша историја. Потврдивме минимум пратеничка група и некаде околу 60 илјади гласа. Ќе бидеме со граѓаните и ќе работиме за граѓаните“, изјави вечерва претседателот на движењето ЗНАМ, Максим Димитриевски.

Лична архива

Тој им честита на граѓаните на државата, кои, како што рече, покажале сенс за државата.

„Македонија избра претседател. Сакам да ѝ честитам на професорката Гордана Силјановска-Давкова за големата победа и да ѝ посакам успешен мандат, да ја води Македонија во правилна насока, да биде секогаш тука за граѓаните бидејќи нашата борба е и ќе биде за граѓаните. Да му честитам и на ВМРО-ДПМНЕ за убедливата победа што ја освои“, рече Димитриевски.

Тој напомена оти верува дека овие избори ќе бидат дополнителна поука за сите други политички субјекти што гравитираат на политичката сцена.

„Гордо можам да потврдам дека ЗНАМ од вечерва ја започнува својата борба за достоинствена Македонија“, подвлече Димитриевски.

Лидерот на политичката партија Левица, Димитар Апасиев, вечерва соопшти дека имаат освоено шест пратенички мандати на парламентарните избори и дека очекуваат да освојат уште еден пратенички мандат.

Лична архива

Во првата изборна единица, како што информира на прес-конференција, имаат двајца пратеници, во втората еден пратеник, во третата еден сигурен, а се борат за уште еден пратенички мандат, за кој во прашање се 200-300 гласа, во четвртата еден пратеник и во петтата изборна единица еден пратеник.

Тој најави дека прво барање на Левица ќе биде воведувањето една изборна единица.

„Она за што се залагавме, тоа ни успеа. Ја кутнавме црвената буржоазија, што беше наш детски сон уште од транзицијата, на под 20 пратеника. Друга наша значајна победа, и покрај сета наша маргинализација и фаворизација на Максо, го препопловивме проектот на ЗНАМ на половина од претседателските избори, што покажува дека овој изборен систем повторно нè краде, затоа што некаде водиме за 4.000 гласа, а имаме ист број пратеници. Тоа ќе биде првото барање на Левица - воведување една изборна единица“, рече Апасиев.

Тој најави жестока дебата во Собранието.

„Левица ќе продолжи појако, пет пати појако од сега, затоа што секој наш пратеник вреди колку десет нивни. Да знаат дека ги чека пекол во Собранието со нашите борбени пратеници“, рече Апасиев.