Гордана Силјановска-Давкова го доби уверението за претседателка на државата

Државната изборна комисија (ДИК) денеска и издаде уверение за избрана претседателка на Македонија на Гордана Силјановска-Давкова откако претходно на седница ги објави конечните резултати од претседателски избори одржани на 24 април и 8 мај годинава. Уверението на Силјановска-Давкова и го врачи претседателот на ДИК Александар Даштевски и во име на комисијата посака успешен мандат.

Даштевски на седницата констатираше дека за претседателка на Македонија е избрана Гордана Силјановска-Давкова со мнозинство гласови од избирачите кои гласале. Силјановска-Давкова освои  561.000 гласови, наспроти нејзиниот противкандидат Стево Пендаровски за кого гласале 251.899 лица.

Државната изборна комисија на седницата утврди дека вкупниот број на запишани избирачи за претседателските избори кои биле запишани во Избирачкиот список изнесува 1.814.317, а гласале 861.218. Вкупниот број на неупотребени гласачки ливчиња е 953.121, на важечки ливчиња 812.899, на неважечки ливчиња 48.289, а процентот на избирачи кои гласале е 47,47.

За постапката за сумирање на резултатите за претседателските избори до ДИК немаше приговори, додека за парламентарните кои се одржаа исто така на 8 мај се доставени девет од Коалицијата Вреди, осум од ВМРО-ДПМНЕ,  пет од СДСМ и четири од Левица. Даштевски посочи дека станува збор за групни приговори со опфатени повеќе избирачки места.

По објавувањето на конечноста на изборните резулатати за претседателските избори, ДИК треба да достави извештај до  Собранието за да биде закажана седница за инаугурација на новата претседателка која според најавите ќе одржи утре напладне.  Таа пред пратениците од стариот состав треба да даде свечена изјава по која и започнува да тече нејзиниот мандат. Мандатот на актулениот претседател и нејзин против кандидат истекува утре.

Универзитетската професорка Гордана Силјановска-Давкова ќе биде шестиот претседател на Македонија и прва жена која е избрана на оваа позиција.

Во моментов нема коментари за веста. Биди прв да коментира...

Остави коментар