Медиумите во САД се против користење на нивната содржина за обучување на четботови

Големи медиумски организации, меѓу кои „Си-ен-ен“ (CNN), „Ен-би-си“ (NBC) и „Ју-ес-еј тудеј“ (USA Today), се приклучија на иницијатива за ограничување на складирањето на нивната содржина во веб-архива што ја користат компании за вештачка интелигенција за обучување на четботови.

Тие медиуми се дел од група од 20 издавачи кои се откажале од тоа нивната содржина да се зачувува во онлајн репозиториумот што го одржува непрофитната организација „Комон кроул“ (Common Crawl), според писмо прегледано од „Блумберг“.  „Њуз/медија алијанса“ (News/Media Alliance), која ги претставува весниците и списанијата, во средата испрати писмо до „Комон кроул“ барајќи да ги почитуваат барањата на издавачите за отстранување на содржината од десетици нивни веб-страници и да ја забранат неовластената употреба на нивната работа, вклучително и за ВИ цели.

„Развивачите на ВИ, вклучувајќи некои од најмоќните технолошки компании во светот, всушност ја користат содржината на ‘Комон кроул’ за да ги напојуваат своите комерцијални ВИ алатки и производи - предизвикувајќи значителна штета на нашите членови,“ напиша непрофитната организација. „Комон кроул“ одби да коментира за писмото.

Даниел Кофи, претседателка и извршна директорка на „Њуз-медија алијанса“ (News/Media Alliance), рече дека дознала за масовната употреба на податоците на „Комон кроул“ за обучување на ВИ пред околу три години. „Ние го сметаме овој вид користење на нашата содржина без дозвола како прекршување на авторски права,“ рече таа во интервју.

Основана во 2007 година, „Комон кроул“ користи бот за да го пребарува интернетот и да презема податоци со цел да создаде дигитална архива достапна за секого. Некои компании, меѓу кои „Опен-еј-ај“, „Гугл“ и „Мета“, ја користеле оваа база на содржини за развој на четботови како ЧетГПТ. „Комон кроул“ исто така добила донации од ВИ компании, меѓу кои „Опен-еј-ај“ и „Антропик“.

Медиумите се загрижени дека четботовите и резултатите од пребарување потпомогнати од ВИ ќе ја крадат нивната содржина, ќе го намалат веб-сообраќајот и ќе им одземат вредни приходи од реклами. „Њујорк тајмс“ ги тужеше „Мајкрософт“ и „Опен-еј-ај“ за наводно прекршување на авторски права што предизвикало штета од милијарди долари. Весникот тврдеше дека неговите статии биле извлечени од интернет и речиси буквално копирани во одговорите на четботови, забележувајќи дека „Комон кроул“ придонела со податоци за обучување на ВИ. Други компании потпишале профитабилни лиценцни договори што им дозволуваат на компаниите да ја користат нивната содржина во ВИ алатки.

„Комон краул“ воспостави регистар за исклучување што им овозможува на издавачите да побараат нивната содржина да биде изземена од веб-пребарувањата. Сепак, истрага на списанието „Атлантик“ во ноември тврдеше дека „Комон кроул“ не секогаш ги почитува овие барања и дека ги заобиколува платените ѕидови на веб-страниците за да извлекува содржина - практика за која непрофитната организација вели дека не ја применува. „Комон кроул“ ги негираше овие обвинувања во блог-пост и објави дека „секогаш работела во добра волја со издавачите.“