Коосновачот на „Енвидија“ (Nvidia), Џенсен Хуанг, му се придружи на американскиот претседател Доналд Трамп за време на неговата посета на Кина како дополнување во последен момент на патувањето, ставајќи ги ВИ и технологијата во центарот на вниманието пред самитот во Пекинг.
Хуанг е меѓу неколкуте американски бизнис-лидери, вклучувајќи ги Тим Кук од „Епл“ (Apple Inc.) и Илон Маск од „Тесла“ (Tesla Inc.), кои се дел од првото патување на Трамп во странство откако започна војна на Блискиот Исток. Ќе имаат 36-часовни разговори со кинескиот лидер Шји Џјинпинг, за кои се очекува да ја опфатат војната, царините и самоуправниот остров Тајван. На списокот на учесници до вторникот не беше вклучен Хуанг, чија компанија ги произведува чиповите што се во срцето на бумот на ВИ и која се залага за поголема слобода на пазарот што тој го опиша како можност вредна 50 милијарди долари.
Главниот извршен директор на „Енвидија“ беше забележан на пистата додека се качуваше во претседателскиот авион, а Трамп подоцна го потврди неговото присуство во објава на социјалните мрежи, наведувајќи дека е чест што Хуанг и другите бизнис-лидери се дел од американската делегација. На Трамп ќе му се придружат и Кели Ортберг од „Боинг“ (Boeing Co.) и Дејвид Соломон од „Голдман Сакс“ (Goldman Sachs Group Inc.).
„Ќе побарам од претседателот Шји, лидер со исклучителен углед, да ја ‘отвори’ Кина за овие брилијантни луѓе да можат да ја покажат својата магија и да помогнат Народна Република Кина да достигне уште повисоко ниво!“, напиша Трамп во објавата. „Всушност, ветувам дека кога ќе бидеме заедно, а тоа ќе биде за неколку часа, тоа ќе биде моето прво барање.“
Не е јасно дали Трамп ќе покрене со Шји какви било прашања што конкретно се однесуваат на „Енвидија“, чии акции го продолжија растот од повеќе од 3 отсто во тргувањето по затворањето на пазарот на платформата „Блу Оишн“ (Blue Ocean).
Главната тема би била барањето Пекинг да одобри кинеските клиенти да можат да ги купуваат напредните H200 ВИ чипови на „Енвидија“. Тие производи, кои се користат за развој и функционирање на модели како „Чет ГПТ“ на „Опен еј-ај“ (OpenAI), отсекогаш барале дозвола од Вашингтон за извоз во Кина поради американската загриженост дека технологијата би можела да ги зајакне воените капацитети на азиската земја.
Bloomberg
Тимот на Трамп пред неколку месеци одобрил лиценци за H200 чиповите, во голем пресврт на американската политика и голема победа за Хуанг од „Енвидија“, но Пекинг останува пречка. Иако кинеската централна власт со години се жали на американските ограничувања за извоз на напредна технологија, Пекинг истовремено сака да постигненезависност во производството на полупроводници и да ги зајакне домашните шампиони како „Хуавеи“ (Huawei Technologies Co.). Минатата година Кина го одби увозот на помалку напредните ВИ чипови H20 на „Енвидија“.
Патот до продажбата на H200 чиповите беше долг, а можноста се појави откако Кина го блокираше увозот на H20 чиповите. „Енвидија“ ја обезбеди поддршката од Трамп за извоз на H200 чиповите во декември, како и првичните американски лиценци на почетокот на 2026 година. Потоа, во март, Хуанг изјави дека „Енвидија“ добила дозвола од Вашингтон за испораки до „многу клиенти“ во Кина и дека соодветно го зголемува производството на H200 чиповите. Тоа следуваше и по добивањето официјални нарачки од компании во азиската земја — знак дека Пекинг ја одобрил продажбата.
Но, тие кинески компании подоцна ја информирале „Енвидија“ дека всушност не можат да ги реализираат набавките, според лице запознаено со ситуацијата. А во април, американскиот министер за трговија Хауард Латник изјави дека ниту еден H200 чип не бил испорачан до кинески компании бидејќи „кинеската централна власт сè уште не им дозволила да ги купат чиповите, затоа што се обидува инвестициите да останат насочени кон домашната индустрија“. Не е јасно со колкав нов залихен капацитет моментално располага „Енвидија“.
Портпаролот на Белата куќа, Стивен Чунг, прашан зошто Хуанг од „Енвидија“ сега му се приклучува на патувањето на Трамп, изјави дека распоредот на Хуанг се променил и „едноставно така се погодило“. Според лице запознаено со ситуацијата, Трамп утрово му се јавил на Хуанг и го поканил да дојде, по што директорот на „Енвидија“ отпатувал за Енкориџ, каде што претседателскиот авион требало да слета. Чунг изјави дека не знаел за телефонски разговор меѓу Трамп и Хуанг пред промената на распоредот.
„Џенсен присуствува на самитот на покана од претседателот Трамп за да ги поддржи Америка и целите на администрацијата“, соопшти „Енвидија“.
Раководителите што му се приклучуваат на Трамп доаѓаат од компании со значително присуство во Кина и претставуваат сектори за кои се очекува да бидат дел од деловната агенда на патувањето, посочува друго лице запознаено со ситуацијата.
Американските ограничувања за извоз долго време се чувствителна точка во трговските разговори меѓу Вашингтон и Пекинг.Американските ограничувања за пристапот на Кина до американска технологија минатата година поттикнаа застој меѓу двете најголеми економии во светот, при што Пекинг воведе ограничувања за испораките на ретки метали кон американски клиенти.
Само минатиот четврток, Хуанг изрази подготвеност да му се придружи на Трамп на долгоочекуваното патување во Кина, каде што претседателот треба да се сретне со својот кинески колега Шји Џјинпинг.
„Доколку бидам поканет, тоа би била привилегија — голема чест да ги претставувам САД и да отпатувам во Кина со претседателот Трамп“, изјави Хуанг за Си-ен-би-си.
.webp){kind=icon}
