Претстојниот медицински преглед на американскиот претседател Доналд Трамп повторно го засилува вниманието околу неговата здравствена состојба, која го следи уште од неговата прва кампања за највисоката функција во државата пред повеќе од една деценија.
Трамп во вторник ќе замине во Националниот воен медицински центар „Волтер Рид“ за својот четврти јавно објавен лекарски преглед од почетокот на вториот мандат. Белата куќа понуди малку детали за посетата, наведувајќи дека ќе опфати „рутински годишни стоматолошки и медицински прегледи“.
Bloomberg
Сепак, начинот на кој беше објавена посетата, отвори дополнителни прашања за здравствената состојба на Трамп. Ова ќе биде негова трета посета на стоматолог годинава, повеќе од вообичаените две годишни контроли кај повеќето Американци, а следува по три лекарски посети минатата година.
Случајот дополнително го става фокусот и на возраста на Трамп, кој следниот месец, односно на 14 јуни, полни 80 години. Тоа доаѓа во политички чувствителен момент за претседател кој настојува да проектира енергија и сила.
САД се заглавени во тежок конфликт со Иран што предизвика потреси врз глобалната економија. Трамп, исто така, се соочува со отпор од републиканците во Конгресот, кои стравуваат од пораз на изборите на средина од мандатот во ноември, делумно поради гласачи кои ја изгубиле довербата во неговото лидерство.
Една година по почетокот на вториот мандат, кај Трамп се забележуваат и видливи знаци на стареење, вклучително и отоци на нозете, промена на бојата на кожата на вратот и модринки на рацете, кои се обидува да ги прикрие со шминка. Кај него е дијагностицирано и често заболување на вените. Минатата година бил подложен и на напредни снимања на срцето и стомакот, кои Белата куќа ги опиша како „превентивни“. Тој често ги затвора очите на подолг период за време на настани во Овалната соба.
Bloomberg
Досега возраста на Трамп не е политички товар како што беше случајот со неговиот претходник Џо Бајден, чие јавно видливо физичко и ментално опаѓање го натера да се откаже од кандидатурата за реизбор на 81-годишна возраст. За разлика од сè поизнемоштениот Бајден, Трамп има понагласено и поенергично присуство. Тој, исто така, призна дека нема право да бара уште еден мандат.
Трамп долго време ги чува во тајност, а понекогаш и нејасно ги прикажува деталите за својата здравствена состојба, објавувајќи селективни информации што оставаат многу прашања без одговор. Во текот на неговата политичка кариера, лекари и советници даваа ограничени и нејасни описи за неговото здравје, притоа задржувајќи подетални информации што претходните претседатели јавно ги објавувале. Вниманието кон Трамп е дополнително засилено поради фактот што тој е најстарата личност што некогаш била инаугурирана за претседател на САД.
„Она што ќе биде соопштено е она што Трамп и Белата куќа сакаат да го знаеме“, изјави Артур Каплан, медицински етичар од Медицинскиот факултет на Универзитетот Њујорк, кој се занимава со здравјето на американските претседатели. Тој потсети дека и претходни администрации ги прикривале здравствените проблеми на Френклин Делано Рузвелт, Џон Ф. Кенеди и Роналд Реган.
„Не очекувам големи откритија“, рече Каплан. Тој додаде дека важни прашања се дали Трамп има доволно сон и каков е квалитетот на неговиот слух.
Белата куќа најави дека ќе објави соопштение за посетата.
„Претседателот Трамп е најостриот и најотворен претседател во американската историја, кој непрекинато работи на решавање проблеми и исполнување на своите ветувања, и тој останува во одлична здравствена состојба“, изјави портпаролот на Белата куќа, Дејвис Ингл.
Трамп, кој уживаше да го исмева Бајден поради возраста, тврди дека е во одлична форма. За време на неодамнешен говор во пензионерска заедница во Флорида, им рече на присутните: „Јас не сум старец. Многу сум помлад од вас. Јас сум многу помлад човек од вас.“
Bloomberg
По физичкиот преглед во април минатата година, Шон Барбабела, лекарот на претседателот, го пофали „активниот начин на живот“ на Трамп, посочувајќи ги неговите „чести победи на голф-турнири“.
За време на првата кампања на Трамп за Белата куќа во 2015 година, неговиот лекар Харолд Борнстин во писмо напиша: „Доколку биде избран, можам недвосмислено да кажам дека господинот Трамп ќе биде најздравата личност некогаш избрана за претседател.“ Години подоцна, Борнстин за Си-ен-ен изјави дека Трамп сам ја диктирал таа изјава. Потоа, за време на првиот мандат на Трамп, тогашниот лекар на Белата куќа, Рони Џексон им изјави на новинарите дека Трамп има „одлични гени“.
И среде спротивставените објаснувања што Белата куќа ги даваше за снимањата направени минатата година, Трамп им рече на новинарите дека не знае кој дел од телото му бил анализиран, иако инсистираше дека резултатите биле „совршени“.
Трамп понекогаш и самиот признава дека не е физички активен. За време на настан во Овалната соба на кој го најави обновувањето на Претседателската награда за физичка подготвеност, Трамп се пошегува дека вежба „максимум околу една минута дневно“.
Сепак, неговото однесување отвори прашања дали Трамп денес е помалку воздржан отколку во првиот мандат, иако тој со години намерно негува хаотичен јавен имиџ и сега има помала контрола од луѓето околу него. Сè почесто влегува во конфликти со новинари и користи пцовки, постојано ги повторува истите теми — како реновирањето на Белата куќа — а редовно објавува и серии доцновечерни пораки на социјалните мрежи полни со теории на заговор.
Изгледа дека Трамп е свесен за прашањата околу неговата здравствена состојба, па постојано нагласува дека успешно поминал повеќе когнитивни тестови.
„Го полагав и бев одличен сите три пати“, изјави Трамп на митинг во петокот во Њујорк. „Убаво е да се биде паметен.“
Во исто време, тој призна дека неговиот татко Фред имал „нешто како Алцхајмер“ од средината на осумдесеттите години.
Запрашан во интервју за списанието „Њујорк“ претходно годинав дали стравува дека тоа би можело да му се случи и нему, Трамп ја оттурна секоја загриженост.
„Не, воопшто не размислувам за тоа. Знаете зошто?“ рече тој. „Затоа што, што и да е, мојот став е — што биде, нека биде.“
.webp){kind=icon}
