Линдзи Греам, долгогодишен сенатор од Јужна Каролина и познат застапник на цврста надворешна политика, кој од скептик кон Доналд Трамп се претвори во еден од неговите најсилни сојузници, почина во саботата. Имаше 71 година.
Причината за смртта била „кратка и ненадејна болест“, соопшти неговиот кабинет во објава на платформата X, без да објави дополнителни детали. Греам бил во Киев во петокот, пред да се врати во Вашингтон, каде што требало да гостува во емисијата „Мит на прес “ (Meet the Press) на телевизијата „Ен-би-си“ (NBC) во недела наутро.
Според „Ен-би-си“, од каде се повикуваат на полициски радио-комуникации, итните служби биле повикани во неговиот дом на Капитол Хил поради пријава за „срцев застој“.
„Семејството на Греам е благодарно за молитвите во овој период и бара приватност во овие исклучително тешки моменти“, се наведува во соопштението.
Искусниот републикански политичар беше член на Сенатот од јануари 2002 година. Претходно беше член на Претставничкиот дом од 1995 до 2003 година, како и пратеник во законодавното собрание на Јужна Каролина. Од 2019 до 2021 година беше претседател на Сенатскиот комитет за правосудство, а неодамна раководеше со Комитетот за буџет.
Во трка за петти сенаторски мандат, Греам се соочуваше со демократската кандидатка Ени Ендрус, педијатарка. На 9 јуни победи на републиканските прелиминарни избори.
Залагање за санкции против Русија
Меѓу неговите последни законодавни активности беше учеството во двопартиска група сенатори која минатата недела соопшти дека постигнала договор со администрацијата на Трамп за воведување нови санкции против Русија, со цел да се зголеми економскиот притисок врз Кремљ за прекин на војната во Украина.
Воен ветеран и чест посетител на американските војници стационирани во странство, Греам првпат беше избран во Сенатот во 2002 година. На изборите во 2008 година стана првиот политичар во историјата на Јужна Каролина кој освоил повеќе од еден милион гласови, според неговата официјална биографија.
Од критичар до близок сојузник на Трамп
Греам беше еден од најгласните критичари на Доналд Трамп за време на неговата кандидатура за републиканската претседателска номинација во 2016 година, нарекувајќи го „ксенофоб кој поттикнува расни поделби и верски фанатик“, како и „срам за партијата“. На тогашниот Твитер, Греам предупредуваше дека изборот на Трамп за лидер на Републиканската партија може да ја уништи партијата.
Сепак, за време на првиот претседателски мандат на Трамп, двајцата изградија блиско политичко сојузништво кое со текот на времето прерасна во силна лојалност од страна на сенаторот. Во повеќе наврати играа голф заедно на терените на Трамп во Вирџинија и Флорида.
„Линдзи беше прекрасен пријател и секогаш беше тука кога ми требаше“, напиша Трамп во објава на социјалните мрежи во јуни.
Воена кариера
Линдзи Олин Греам е роден на 9 јули 1955 година во Централ, Јужна Каролина. Неговите родители, Мили и Флоренс Џејмс Греам, воделе ресторан и бар во малиот град југозападно од Гринвил.
Тој беше прв член на своето семејство што завршил факултет, студирајќи на Универзитетот на Јужна Каролина во Колумбија, каде што дипломирал психологија и право.
Греам служел шест и пол години како правен советник во активниот состав на Американските воздухопловни сили. Од 1984 до 1988 година бил распореден во Германија, во воздухопловната база Рајн-Мајн. По напуштањето на активната служба во 1989 година, се приклучил на Воздушната национална гарда на Јужна Каролина, каде што служел до 1995 година.
За време на Првата заливска војна во почетокот на 1990-тите повторно бил повикан на активна служба и служел во базата Мекинтајр во Јужна Каролина.
Поддржувач на Украина и критичар на Иран
Греам беше еден од најострите критичари на Иран и застапник за силен воен одговор против Исламската Република. Воедно беше и еден од најцврстите поддржувачи на Украина во Сенатот, посетувајќи го Киев десет пати од почетокот на целосната руска инвазија, која сега е во својата петта година.
„Му благодарам на Линдзи што ги препознаваше жртвите и храброста на нашите војници. Колку е посилна Украина на бојното поле, толку се поголеми шансите дипломатијата на крајот да успее“, напиша украинскиот претседател Володимир Зеленски во објава на платформата X во саботата.
.webp){kind=icon}
