Пет вести за почеток на денот: Каде оди Кина?

Европската Унија и официјално започна истрага против субвенциите за електрични возила произведени во Кина. На тој начин е поведена едногодишна истрага што може да го процени ефектот на привремените мерки, како што се компензаторните царини воведени во следните девет месеци. Истрагата, која минатиот месец ја најави претседателката на Европската комисија, Урсула фон дер Лајен, ќе се фокусира на новите електрични возила со батерии (BEV) и наводните субвенции од кинеската држава.

Подолу петте вести што ги издвоивме за почеток на денот.

 

Кина во регионот Адрија - каде и колку инвестира?

Со околу 14 милијарди евра инвестирани во последните пет години, Кина тежнее да биде важен играч на кој треба сериозно да се смета во регионот Адрија во иднина. Моментално светот е загрижен поради забавувањето на економијата на една од најголемите светски економски сили. Како ќе влијае тоа на инвестициските активности во регионот?

Дека во иднина е неопходно да се смета на кинеските инвестиции покажува и меморандумот потпишан во септември за новиот инвестициски циклус на кинеската компанија „Зијин мининг груп“ (Zijin Mining Group) во српскиот рудник за бакар во Бор од дури 3,8 милијарди долари (3,5 милијарди евра) во следните десет години.

 

Македонија преплавена од кинески производи, инвестициите се реткост

Некогашниот малку значаен трговски партнер на Македонија, во последните неколку години станува редовен член на листата од десет земји со кои Македонците имаат најголема трговска размена. Притоа, важно е да се нагласи дека увозот од Кина континуирано го надминува македонскиот извоз. Вредноста на македонскиот извоз во Кина во 2004 година изнесуваше околу еден милион евра, а лани 54,9 милиони евра.

Истовремено, вредноста на увозот од Кина во Македонија се зголеми од 64,9 милиони евра на 949 милиони евра. Растот на трговската размена меѓу двете земји продолжува и во првата половина од годинава, период во кој Кина стана петти најголем трговски партнер на Македонија (зад Германија, Велика Британија, Грција и Србија).

 

Мекарти е првиот разрешен спикер на Претставничкиот дом, што велат за тоа пазарните стратези?

Историскaта смена на републиканецот Кевин Мекарти од функцијата претседател на Претставничкиот дом може да го зголеми ризикот од намалување на кредитниот рејтинг на САД и дополнително да ги разниша пазарите, сметаат стратезите. Заминувањето на Мекарти од лидерската функција најверојатно ќе предизвика бран на политичка несигурност во Вашингтон за прашањата како што се федералните трошоци и ќе го стави во фокус потенцијалот за блокада на владата додека пратениците се расправаат за распределбите на буџетот.

Реагираше и пазарот. Обврзниците ги продолжија загубите во азиското тргување во средата, бидејќи соборувањето на Мекарти ја зголеми загриженоста за долготрајни повисоки каматни стапки и враќање на традиционалните премии за ризик од обврзниците.

 

ММФ: Безбедноста на храната и зелената транзиција под закана

Фрагментирањето на пазарите на суровини, што е главно предизвикано од руската инвазија на Украина, го загрозува безбедното снадбување со храна и ризикува да ја зголеми цената на почистата енергија, предупреди Меѓународниот монетарен фонд. Минералите клучни за зелената транзиција, вклучително и кобалтот, литиумот и бакарот, како и земјоделските производи како што е пченицата, се особено ранливи на „геоекономска фрагментација“, објави ММФ.

Руската инвазија на Украина во 2022 година и западните санкции ги нарушија глобалните пазари за храна, гориво и ѓубрива, одржувајќи ги цените покачени и влошувајќи ги инфлациските притисоци. Во меѓувреме, САД бараат нови трговски партнерства и се фокусирани на таканаречените критични минерали, кои се неопходни за зелената технологија, бидејќи расте загриженоста за доминантната позиција на Кина во снабдувањето.

 

Јапонски милијардер порачува: Разбудете се, прифатете ја вештачката интелигенција

Основачот на „Софтбанк“ (SoftBank Group Corp), милијардерот Масајоши Сон ја замоли јапонската публика да ја прифати вештачката интелигенција, држејќи стравстен говор за потребата што порано да се усвои новата технологија. „Јапонија, која во голема мера го пропушти почетниот бран на раст од интернетот, не може да си дозволи да изгуби уште три децении“, рече Сон за време на оптимистичкото главно обраќање на „Софтбанк Ворлд“ (SoftBank World), годишен настан на технолошкиот инвеститор за домашните корпоративни клиенти.

Истакнувајќи дека повеќе од 70 проценти од компаниите во Јапонија или забрануваат или размислуваат да ја забранат употребата на генеративна вештачка интелигенција, Сон мавташе со рацете во фрустрација. „Да се каже - не користете вештачка интелигенција - е како да кажете, не возете автомобил или не користете електрична енергија“, рече тој.