Министерството за животна средина и просторно планирање (МЖСПП) информира дека во Скопје е надминат прагот за концентрација на честички со големина до 10 микрометри и оти стапуваат во сила препораките од Уредбата за гранични вредности за нивоа и видови на загадувачки супстанции во амбиенталниот воздух.
Во согласност со Уредбата во која е дефиниран прагот на алармирање за суспендирани честички со големина до 10 микрометри (надминување на вредност од 150 mg/m3 во текот на два последователни дена) и добиената временска прогноза од Управата за хидрометеоролошки работи (УХМР), прагот е надминат на мерните места Лисиче и Ректорат во Скопје, се наведува во денешното соопштение од МЖСПП.
Врз основа на тоа, а во согласност со заклучоците од записникот од владината седница одржана уште на 28.11.2017 година, за градот Скопје стапуваат во сила следните препораки и мерки:
МЖСПП, во соработка со Министерството за здравство, е должно:
- Да им препорача на сите работодавци да ги ослободат од работни обврски бремените жени, лицата постари од 60 години и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар.
- Да им препорача на сите работодавци да го реорганизираат работното време и лицата што работат на отворено да работат од 11 до 17 часот.
- Да препорача да не се организираат спортски натпревари и други културни манифестации на отворено.
- Да обезбеди услови за зголемени активности на службите за итна медицинска помош, домашна посета и патронажна служба.
Владата треба:
- Да ги задолжи сите органи на државната управа, агенциите, фондовите, бироата, заводите, јавните претпријатијата и АД во државна сопственост, како и на единиците на локална самоуправа, да ја намалат (до 50 отсто) употребата на службените возила.
- Да обезбеди ограничување на работите на градежните објекти.
Министерство за труд и социјална политика, во соработка со Црвениот крст, Здравствениот дом и единиците за локална самоуправа, треба:
- Да обезбеди прифатилишта за сместување на бездомниците.
- Да им даде поддршка на старите осамени лица преку организирани посети.
Министерството за здравство треба:
- Да ја задолжи службата за итна медицинска помош да доставува информација до ИЈЗ за бројот на повиците (според дијагноза/код на МКБ10, пол, возраст, место на живеење/општина), за времетраењето на епизодата на алармантно загадување на воздухот на дневна основа, сè до завршувањето на епизодата и една недела по завршувањето.
Државниот инспекторат за животна средина треба:
- Да започне со вршење зачестена контрола на инсталациите што поседуваат дозвола А-ИСКЗ, да спроведе контролни мерења на емисиите на загадувачки супстанции во амбиенталниот воздух со акредитирана лабораторија, со цел да се утврди дали се применуваат пропишаните услови/мерки во дозволата по однос на емисиите во воздух.
Министерството за животна средина и просторно планирање ќе подготви и ќе достави:
- Препорака до инсталациите што поседуваат дозвола А-ИСКЗ за намалување на капацитетот на производство (до 50 отсто), со што од оваа мерка ќе бидат исклучени инсталациите што произведуваат топлинска или електрична енергија.
- ЕЛС се должни да ги спроведат мерките пропишани во краткорочните планови или краткорочните мерки донесени на советите на општините.
.webp){kind=icon}