Лидерите на Г7 ќе ја повикаат Кина да престане да ја поддржува руската војна против Украина, се наведува во нацрт-изјава во која „Блумберг“ (Bloomberg) имал увид.
Сојузниците на Киев го обвинуваат Пекинг дека обезбедува технологија и делови за оружје или нивно производство. Тие веруваат дека на тој начин Кина ѝ помага на Москва да ги заобиколи трговските ограничувања на Г7 за овие стоки. Забранетите стоки често пристигнуваат во Русија преку трети земји, како што се Кина или Турција, или преку мрежа на посредници.
„Кинеската континуирана поддршка за руската воена индустрија има значителни и далекосежни безбедносни импликации“, се наведува во нацрт-изјавата, која сепак би можела да се промени пред лидерите да се состанат на самитот во Италија, кој започнува в четврток.
Како дел од напорите да се одговори на заобиколувањето на санкциите, се очекува Г7 и Европската Унија да воведат нови санкции во наредните денови, објави претходно „Блумберг“.
Мерките што се разгледуваат вклучуваат наведување на повеќе компании, насочени дејства против банките во трети земји што ја олеснуваат трговијата, барање компаниите да ги засилат проверките на нивните странски филијали и подизведувачи и проширување на ограничувањата за производите со западна марка што продолжуваат да пристигнуваат во Русија.
Г7 ќе го повика и Пекинг да ја поттикне Русија да се повлече од Украина и да го поддржи мирот.
Се очекува лидерите да кажат дека кинеската политика „создава глобални ефекти, нарушувања на пазарот и штетен вишок на капацитети во многу сектори“, се наведува во нацрт-изјавата.
Г7 ги потврдува своите тековни напори за намалување на својата критична зависност од Кина, истовремено повторувајќи дека нема намера економски да се одвои од неа.
„Не се обидуваме да ѝ наштетиме на Кина или да го попречиме нејзиниот економски развој, всушност, растечката Кина што ги почитува меѓународните правила е во глобален интерес“, се наведува во нацрт-изјавата.
Сето ова доаѓа во моменти кога трговските тензии меѓу Западот и Кина се зголемуваат, при што Европската Унија неделава треба да потврди дека ќе воведе царини за електричните возила од јули, а Пекинг се очекува да возврати.
Претставниците на Г7 сè уште работат на финализирање на деталите за тоа како да се искористи профитот од замрзнатите руски средства, за што се надеваат дека ќе биде една од главните теми на самитот.
.webp){kind=icon}
Во моментов нема коментари за веста. Биди прв да коментира...