text size
Со текот на времето Италија стана топ дестинација за светските богаташи, но можеби дојде време да се плати за тоа задоволство. Оваа медитеранска земја размислува да го зголеми рамниот данок на странските приходи за новите резиденти.
Годишниот фиксен рамен данок на странски приходи од 100 илјади евра би можел да се удвои на 200 илјади евра, објави во средата италијански „Ил месаџеро“.
Имено, богатите луѓе што ќе се одлучат да се преселат во Италија можат да поднесат барање за тој данок на својот приход остварен во странство за да заштедат пари. Првпат воведена во 2017 година, оваа одредба ги ослободува новите резиденти од плаќање странски приходи, подароци и наследство на 15 години, во замена за еднократна исплата од 100 илјади евра годишно.
Секој приход остварен во Италија редовно би се оданочувал, пишува „Блумберг“.
Меѓутоа, премиерката Џорџа Мелони сега посегнува по различни методи за да собере повеќе пари, поради притисокот врз јавните финансии на Италија пред есенската пресметка. Официјални лица од нејзиниот кабинет минатата недела одржаа прелиминарни разговори со тамошното министерство за финансии за тоа како да се соберат повеќе даноци од заемодавците и осигурителите што имаат корист од зголемувањето на каматите во последните неколку години, истакнаа изворите. Сепак, сѐ уште не е донесена одлука.
Во нацрт-уредбата може да дојде до промена на даночниот режим, за што ќе се расправа на седницата на владата в среда. Откако Италија воведе рамен фиксен данок, околу 4.000 луѓе се преселија во таа земја и го користат тој систем.
Добро е познато дека некои земји се многу поповолни за богаташите кога станува збор за даноците. На пример, магнатот за недвижности Торд Колстад пред две години ја напушти својата родна Норвешка токму за да избегне зголемување на данокот на богатство. Но не успеа долго да бега од тоа.
Имено, Швајцарија, неговиот нов дом, моментално е среде жестока дебата за даноците на наследството на супербогаташите. Предлогот е државата да оданочува 50 отсто од секое пренесено богатство во вредност од над 50 милиони франци (59 милиони долари).
Таа идеја предизвика револт кај мултимилионерите и милијардерите, сопственици на бизниси, со закани дека ќе ја напуштат Швајцарија и ќе бараат даночен рај на друго место.
И низ светот се водат слични дебати, бидејќи владите разгледуваат начини како да извлечат што е можно повеќе пари од најбогатите, за да се справат со огромните дефицити и да можат да ги финансираат јавните услуги. Мерките од овој тип не стивнуваат, и покрај предупредувањата дека ќе доведат до егзодус на богатите и губење на инвестициите.
Bloomberg
Потсетуваме дека Франција е една од земјите во Европа што во последно време успеаја да привлечат можеби дури и најголем број инвестиции од најголема вредност. Идејата е Париз да стане европски финансиски центар по брегзит, и тоа токму поради тоа што земјата има лоша репутација (строги закони за работни односи, прекумерна регулатива и политички притисок врз компаниите).
Кога станува збор за Швајцарија, ќе биде потребно извесно време додека да се спроведе таа политика, бидејќи според демократскиот систем на земјата, предлогот треба да оди на референдум, кој се очекува за околу две години. Сепак, „Блумберг“ пишува дека дури и спомнувањето на оваа идеја доведува до чувство дека идентитетот на Швајцарија полека се распаѓа.
Поради загриженоста за финансиите по колапсот на „Кредит Свис“, како и пукнатините во многу ценетата неутралност на земјата, предлогот за оданочување на дел од наследството претставува закана за репутацијата на Швајцарија како нација со ниски даноци и поволна деловна средина. Оваа европска земја одамна е позната како оаза на светските богаташи, а особено се истакнува по приватното банкарство.
.webp){kind=icon}
