Шест нови авионски линии со Дубаи, Барселона, Лион, Штутгарт, Базел и Истанбул ќе бидат отворени следната година, најави министерот за транспорт Александар Николоски на денешната прес-конференција во Владата.
Како што информира министерот, четири нови авионски линии се однесуваат на скопскиот аеродром, каде што двапати неделно ќе се лета на релацијата Скопје-Дубаи-Скопје (од 30 март), исто како и Скопје-Барселона-Скопје (од 30 јуни), додека по трипати неделно ќе се лета Скопје-Лион-Скопје (од 30 јуни) и Скопје-Штутгарт-Скопје.
На охридскиот аеродром новина се линиите Охрид-Базел-Охрид, на која ќе се лета двапати неделно, и редовната линија Охрид-Истанбул-Охрид (од 30 март), на која ќе се лета четири пати неделно.
Николоски информира дека државата субвенционира 12 евра по патник на доаѓање на охридскиот аеродром и 9 евра по патник на доаѓање на скопски аеродром. Тој рече дека се очекуваат 200.000 патници плус со новите линии.
„Овие шест дестинации се прекрасна вест за македонските граѓани. Директно поврзување со Дубаи, Барселона Штутгарт, Лион, Базел и Истанбул е прекрасна вест, која ќе донесе многу нови туристи и полесно патување за македонските граѓани“, рече министерот.
Тој дополни дека се во процес на подготовка на втор повик, кој треба да се објави кон крајот на ноември и да донесе нови дестинации.
Во моментот на скопскиот аеродром во лето оперираат 47 дестинации, а на охридскиот осум, додека, во зимскиот период 38 на скопскиот и четири на охридскиот аеродром.
„Визер“ (WizzAir) е авионската компанија задолжена за новите летови за Штутгарт, Базел, Барселона и Лион. „Флај Дубаи“ (flydubai) за Дубаи и „Туркиш ерлајнс“ (Turkish airlines) за Истанбул.
.webp){kind=icon}
