.webp){kind=icon}
Поранешен вработен на „Номура“ (Nomura Securities Co.) е уапсен под сомнение за грабеж и обид за убиство на постар брачен пар, кои биле клиенти на брокерската куќа, објави „Кјодо“ (Kyodo), што е најновата негативна вест за јапонската финансиска фирма.
Дваесет и деветгодишниот маж работел во подружницата на „Номура“ (Nomura Holdings Inc.) кога во јули во Хирошима се случил наводниот криминал, објави „Кјодо“, повикувајќи се на неидентификувано лице вклучено во истрагата.
Тој е осомничен дека ги дрогирал клиентот и неговата сопруга, украл околу 26 милиони јени (171.000 долари) во готовина од нивниот дом и го запалил објектот, според извештајот. Брачниот пар во своите 80-ти години безбедно избегал од пожарот, се наведува во извештајот.
Портпарол на „Номура“ потврди дека лицето е поранешен вработен, кој бил отпуштен поради дисциплински причини, без да каже кога работел таму.
„Многу е жално што еден од нашите поранешни вработени е уапсен“, рече портпаролот.
Апсењето може да ја зголеми загриженоста на инвеститорите за „Номура“, чија репутација веќе е разнишана по откритијата за манипулација на пазарот на обврзници. Извршните директори на „Номура“ се откажуваат од дел од својата плата за да преземат одговорност, соопшти фирмата во четвртокот откако Агенцијата за финансиски услуги изрече казна за трговскиот инцидент од март 2021 година.
Во Јапонија продажниот персонал во брокерските куќи, вклучувајќи ја и „Номура“, често им служи на индивидуалните клиенти преку посета на нивните домови. Малопродажната дивизија на „Номура“ - сега позната како управување со богатство - генерираше повеќе од 40 отсто од претходниот профит на фирмата минатата фискална година.
