„Оземпик“ може да предизвика загуба на видот, покажа нова студија

Блокбастер инјекцијата „оземпик“ (Ozempic) на компанијата „Ново Нордиск“ (Novo Nordisk A/S) е поврзана со зголемен ризик од редок облик на губење на видот, според една студија што ги потврдува истражувањата на Харвардскиот универзитет објавени во текот на годинава.

Пациенти со дијабетес што го користеле „оземпик“ имале повеќе од двапати поголема веројатност да им биде дијагностицирана ретката состојба наречена НАИОН (NAION), отколку оние што користеле друг вид лек за дијабетес, според тим од истражувачи што анализирале повеќегодишни податоци за пациенти од Данска и Норвешка. Студијата не успеала да утврди дали постои слично влијание кај луѓето што го користеле „вегови“ (Wegovy), сестринскиот лек на „оземпик“ против дебелина.

НАИОН се појавува кога губењето на протокот на крв го оштетува оптичкиот нерв и најчесто се јавува кај луѓе над 50 години. Самиот дијабетес, срцевите заболувања, апнејата при спиење и други состојби исто така можат да го зголемат ризикот. Општата стапка на оваа состојба била многу ниска во студијата, со само 1,4 дополнителни случаи на 10.000 годишно во набљудувањето на пациентите што користеле  „оземпик“ во споредба со оние што користеле друг лек за дијабетес.

Сепак, оваа состојба на очите е неповратна, неизлечива и потенцијално предизвикува слепило, при што лекарите нагласуваат дека пациентите треба да бидат информирани за можниот ризик. Главниот автор на студијата одби да даде коментар.

Акциите на „Ново“ паднаа за 5,4 отсто во Копенхаген, што е најмногу во изминатиот месец. Акциите на компанијата годинава порасна за околу 8 отсто, надминувајќи го порастот од околу 4 отсто на индексот на „Блумберг“ за европските фармацевтски компании.

Процена на ризиците и придобивките

Споредувајќи го ризикот со текот на времето, резултатите покажуваат дека пациент со тип 2 дијабетес што користи „оземпик“ 20 години би имал 0,3 до 0,5 отсто шанси да развие НАИОН, изјави истражувачкиот тим.

„Клучно е да се измери потенцијалниот ризик од НАИОН во споредба со значајните терапевтски придобивки од семаглутид“, активната состојка во „оземпик“ и „вегови“, според авторите од Универзитетот во Јужна Данска, Норвешкиот институт за јавно здравје, Универзитетот во Копенхаген и други институции што го спровеле истражувањето.

„Ново“, по детална процена на оваа студија и своја внатрешна безбедносна проверка, изјави дека профилот на ризик и придобивки останува непроменет. Компанијата посочи дека во нивните сопствени испитувања имало многу мал број случаи на НАИОН „без дисбаланс што е во неповолност“ за нивните лекови.

Првите индикации за поврзаност со НАИОН се појавија во помала студија објавена во јули од тим од Болницата за око и уво во Масачусетс, поврзана со Харвард. Ова е пример за тоа како многу ретки несакани ефекти може да се појават само по користење на лекот од многу голем број луѓе.

Подетално прочитајте на овој ЛИНК.