Истражителите велат дека не нашле докази што ги поврзуваат двата смртоносни напади во Њу Орлеанс и Лас Вегас, а ФБИ продолжува со обидите да ги реши двата инциденти што ја шокираа американската јавност на почетокот од 2025 година, пренесува „Блумберг“.
Трагедиите, што се случија само со неколку часа разлика утрото на први јануари, ги зголемија грижите околу безбедноста во САД, на помалку од три недели до инаугурацијата на Доналд Трамп како нов претседател на државата. Трамп, актуелниот претседател Џо Бајден и лидерите во Конгресот остро ги осудија нападите, а надлежните го окарактеризираа нападот во Њу Орлеанс како терористички чин.
„Во моментов не постои конкретна поврзаност помеѓу нападот овде во Њу Орлеанс и оној во Лас Вегас“, изјави заменикот помошник директор на Федералното биро за истраги, Кристофер Раја на прес конференција.
Прочитај повеќе
Напаѓачот од Њу Орлеанс е поранешен американски војник, се поврзува со Исламска држава
Истражителите на ФБИ и локалната полиција соопштија дека напаѓачот не дејствувал сам и дека се бараат неговите соработници.
02.01.2025
Напад со камион пред хотелот Трамп во Лас Вегас
Нападот е извршен со камион „Тесла“
02.01.2025
Властите пак на прес конференција во Лас Вегас додадоа дека сѐ уште трагаат по некаква потенцијална врска помеѓу двата настани.
Претседателот Бајден во четвртокот изјави во Белата куќа дека им наложил на надлежните да ги забрзаат нивните истраги и за двата напади.
„Федералните истражни тела и разузнавачките служби активно истражуваат евентуални домашни или странски контакти и врски што би можеле било како да се поврзани со нападите“, рече Бајден, додавајќи дека “засега не се најдени докази“ за линк помеѓу осомничените во двата напади.
При нападот во Њу Орлеанс, каде што камион влета во толпа за време на новогодишната прослава, загинаа 15 луѓе, а повеќе од 30 се повредени. Осомничениот Шамсуд – Дин Џабар беше убиен потоа на местото на нападот по пресметката со полицијата. Властите велат дека откриле две импровизирани експлозивни направи во близина на местото на нападот, како и знаме на Исламската држава во возилото на Џабар. Тој објавил неколку видеа на социјалните мрежи каде што изразува поддршка за ИСИС и каде што тврди дека ѝ се придружил на терористичката група минатото лето. Меѓутоа, до овој момент, истрагата сѐ уште не може со сигурност да тврди дека токму ИСИС е организатор на нападот, вели за „Блумберг“ претставник на истражните органи којшто инсистирал да остане анонимен.
Во Лас Вегас, пак, „сајбертрак“(Cybertruck) на „Тесла“(Tesla), експлодираше пред хотелот „Трамп“ неколку часа подоцна од нападот во Њу Орлеанс, при што загина возачот, а седуммина беа повредени. Возачот, Метју Алан Лајвелсбергер, бил на отсуство од американската армија, на којашто ѝ служел во американска воена база во Германија. Шефот на полицијата во Лас Вегас, соопшти на прес конференција дека возачот е најден со прострелна рана во главата којашто си ја нанел сам пред експлозијата.
.webp){kind=icon}