Социјалистите и пратениците од десницата во францускиот парламент не го поддржаа предлогот на ултралевичарската партија Непокорена Франција за смена на новиот премиер Франсоа Бајру. Договорот на Израел со Хамас за привремено примирје во Газа е завршен и треба да стапи во сила в недела.
ПОЛИТИКА
Бајру го преживеа гласањето за недоверба
Францускиот премиер Бајру го преживеа гласањето за недоверба во францускиот парламент, откако пратениците од социјалистите и десницата одлучија да не го поддржат предлогот на ултралевичарската партија Непокорена Франција. Во Народното собрание, кое има 577 пратеници, само 131 пратеник го поддржаа предлогот на крајната левица за смена на новиот премиер. Индиректната поддршка на Социјалистичката партија укажува на промена во нивната позиција, откако пратениците од таа партија одиграа клучна улога во смената на претходниот премиер – Мишел Барние.
Нетанјаху: Завршен договорот за примирје со Хамас
Израелскиот премиер Бенјамин Нетанјаху изјави дека договорот со Хамас за привремено примирје во Газа е завршен и дека треба да стапи во сила в недела. Нетанјаху му нареди на својот безбедносен кабинет да се состане во текот на денот за да го одобри примирјето, кое го поддржаа американскиот претседател Џо Бајден и новиот американски лидер Доналд Трамп.
ЕКОНОМИЈА
Кина го достигна целниот раст од пет проценти
Кинеската економија минатата година го достигнала целниот раст од пет проценти, бидејќи силниот извоз ја поттикна економската активност. Кина годинава се обврза на понатамошно олеснување на монетарната политика и поголема државна потрошувачка, додека економијата се подготвува за враќањето на Доналд Трамп во Белата куќа. Потсетуваме дека Трамп се закани со царини од дури 60 проценти на кинеската стока, што би можело да ја десеткува трговијата со таа азиска земја.
БЕРЗИ
Европа
Фјучерсите на европските акции се тргуваат во зелено, пред објавувањето на конечните податоци за инфлацијата во еврозоната за декември. Според прелиминарните процени, инфлацијата минатиот месец забрзала на 2,4 проценти во однос на 2,2 проценти од ноември. Потсетуваме дека европските акции вчерашното тргување го завршија со добивки, при што најмногу порасна европскиот сектор за луксузни производи.
САД
Истовремено, фјучерсите на американските индекси утрово се тргуваат мешано, пред објавувањето на податоците за индустриското производство. „Блумберг“ наведува дека пазарната нестабилност во втората половина од минатата година помогнала да се зголемат заработките на инвестициските банки од Волстрит. Така, профитот на „Морган Стенли“ во четвртиот квартал се зголемил повеќе од двојно. Истовремено, профитот на Банката на Америка ги надмина процените, бидејќи приходите во секторот за инвестициско банкарство достигнаа највисоко ниво во последните три години.
Азија
Акциите во азиско-пацифичкиот регион се во пад, иако кинеската економија минатата година го оствари целниот раст од пет проценти. Азиско-пацифичкиот индекс MSCI ја прекина тридневната низа на добивки, а паднаа и акциите во Јужна Кореја, Австралија и Јапонија.
.webp){kind=icon}