text size
Американскиот претседател Доналд Трамп им наложи на федералните агенции да соработуваат со Одделот за владина ефикасност (DOGE), на чие чело е Илон Маск, и да ги намалат трошоците преку намалување на сопствената работна сила. Американските Федерални резерви не треба да брзаат со намалување на каматните стапки, смета првиот човек на Фед.
ЕКОНОМИЈА
Пауел: Фед не брза со намалување на каматите
Американските Федерални резерви не треба да брзаат со намалување на каматните стапки. Ова го изјави претседателот на Фед, Џером Пауел, во обраќањето пред американскиот Конгрес. Како што истакна тој, американската економија сè уште е силна, поради што Фед нема да брза со приспособување на каматните стапки.
ПОЛИТИКА
Трамп со план за намалување на администрацијата
Трамп им наложи на федералните агенции да соработуваат со Одделот за владина ефикасност (DOGE), на чие чело е Илон Маск, и да ги намалат трошоците преку намалување на сопствената работна сила. Владините агенции ќе можат да вработат најмногу еден работник на секои четири вработени што ќе ја напуштат владата, се наведува во извршната наредба потпишана од Трамп. Претседателот Трамп и Илон Маск се појавија заедно во Овалната соба во вторникот, каде што ги бранеа своите напори за воведување сеопфатни промени во федералната влада и ограничување на трошоците.
Трамп не се откажува од планот за Газа
Американскиот претседател се откажа од својата закана дека ќе ја ускрати помошта за Јордан, откако јорданскиот крал Абдула Втори се согласи да прими околу 2.000 болни деца од Газа. Трамп, на состанокот со јорданскиот крал во Белата куќа, уште еднаш го повтори својот план САД да ја преземат сопственоста над Газа и трајно да ги раселат Палестинците од енклавата.
БИЗНИС
Маск доби „не“ од Алтман
Откако група на инвеститори предводена од Маск понуди да ја купи непрофитната организација што го контролира „Опен еј-ај“ (OpenAI) за 97,4 милијарди долари, се огласи и извршниот директор на компанијата. Сем Алтман изјави дека компанијата „не е на продажба“ и дека Маск веројатно се обидува да го забави напредокот на компанијата со својата понуда. Меѓу Маск и Алтман постои долгогодишен конфликт, кој е насочен кон загриженоста на Маск дека „Опен еј-ај“ се оддалечува од основачките принципи на непрофитната организација.
Depositphotos
БЕРЗИ
Европа
Фјучерсите на европските акции утрово се тргуваат претежно со добивки. Европските пазари и вчера го задржаа позитивниот замав, додека инвеститорите ги анализираа најновите царини воведени од Трамп, но и европската најава за воведување контрамерки.
САД
Од друга страна, фјучерсите на американските индекси се тргуваат претежно со загуби, откако претседателот на Фед, Џером Пауел, повтори дека централната банка нема да брза со понатамошно намалување на каматните стапки. Пауел пред Конгресот изјави дека не е мудро да се шпекулира за царинската политика во овој момент, како и дека регулаторите остануваат посветени на зајакнување на капиталните барања пропишани од Базел III.
Азија
Кога станува збор за акциите во азиско-пацифичкиот регион, тие претежно се тргуваат во зелено. Најголем раст бележат индексите во Хонгконг, а со добивки се тргува и со акциите во континентална Кина.
.webp){kind=icon}
